خريطة الانتخابات فالريف في اليوم الثالث من الحملة. ها شكون أقوى الاقوياء فثلاثة أقاليم المشكلة للريف

الحسيمة الدريوش والناظور، الاقاليم الثلاثة المشكلة لمنطقة الريف وعلى عكس العادة مازال الحملة الانتخابية ماسخناتش فيها، وحتى لعصا ولقتيلة مازال مابدات، المراقبون للاوضاع بالمنطقة يؤكدون أن الحملة الانتخابية مازال مابداتش فعليا واخا وزارة الداخلية أعطت الانطلاقة يوم السبت الماضي، حقاش المرشحين مابغاوش يعطيو الجهد من النهار الاول.
12 لائحة تتصارع في الحسيمة على أربعة مقاعد
إقليم الحسيمة لي كان محط أنظار الاعلام في الآونة الاخيرة بسباب ترشح نجيب الوزاني بإسم حزب العدالة والتنمية رغم أنه أمين عام حزب العهد، مازال الحملة فيه باردة رغم أنه من دوائر الموت في منطقة الريف، علاش حقاش كاين 7 ديال المرشحين صحاح دخلو الانتخابات وهوما نور الدين مضيان عن الاستقلال وهو عضو فالمكتب السياسي ديال الحزب، وعبد الحق أمغار البرلماني عن حزب الاتحاد الاشتراكي عن نفس الدائرة، ومحمد الاعرج عن الحركة الشعبية ونجيب الوزاني عن العدالة والتنمية وعصام الخمليشي لي كان فالاستقلال ومشا للتجمع الوطني للاحرار من بعد ماطاح فإنتخابات مجلس المستشارين بقرار من المجلس الدستوري، ومحمد الحموتي عن الاصالة والمعاصرة.
هادو 6 ديال اللوائح لكن المثير واللي كان آخر من وضع ترشيحه هو شقيق سعيد شعو لي هارب برا المغرب، جمال شعو لي خلق ترشيحو فالحسيمة خلط فالحسابات حقاش غايكون حتى هو منافس قوي، و7 لوائح قوية غادي يوقع فيها تهراس لعظام وغايطيحو منها ثلاثة.
الدريوش : صحاب لفلوس وزعماء القبائل دخلوا صحاح
الدريوش 3 ديال المقاعد لي تعطات ليها من وقت تفرقات على إقليم الناظور، هاد 3 ديال المقاعد غادي يتقاتلوا عليهم 12 مرشح، من بينهم الفاضيلي رئيس المجلس الوطني للحركة الشعبية، وبوجمعة أشن الملياردير لي جا من هولندا وعندو تما "لي كوفي شوب" وكيترشح بإسم حزب العهد والتجديد والانصاف، بالاضافة لعبد الله البوكيلي ولد البوكيلي الاب لي كان أكبر برلماني في إفريقيا، ومعروف على أنه رجل الدولة القوي، زيادة على فؤاد الدرقاوي عن حزب الاصالة والمعاصرة، وأبو القاسم الوزاني شقيق نجيب الوزاني واللي خلا حزب خوه ومشا ترشح بالاتحاد الاشتراكي وكيطلق القرطاس على حزب العهد، زيادة على عمر شوحو لي خرج من الجنب لفؤاد الدرقاوي مرشح الاصالة والمعاصرة وغاينافسو فنفس القبيلة، زيادة على لائحة العدالة والتنمية لي ترأسها محمد لحرش، وباقي اللوائح دخلات ولكن ماشي بقوة بحال اللوائح السابقة.
7 لوائح غادي تنوض بيناتها العافية في قادم الايام بالدريوش لي كتعرف تصويت قبلي أكثر منه تصويت على البرنامج الحزبي، وهادشي كيرفع حظوظ بعض المرشحين لي عندهوم قبائل كبيرة.
الناظور : تراجع نفوذ صحاب لفلوس والمفاجأت متوقعة
إقليم الناظور تحطات فيه 17 لائحة كتافس على 4 مقاعد، من بينها 7 لوائح قوية وغايكون بيناتها منافسة شرسة علاش حقاش المليارديرات مادخلوش من غير مرشح الاتحاد الاشتراكي محمد أبرشان، وحتى هو راه كياكل الدق عبر مواقع التواصل الاجتماعي بسباب القضايا الكثير اللي مرفوعة عليه سواء من طرف مؤسسات الدولة أو المواطنين، حيث يتم الحديث عن هذه القضايا من أجل حث الناس على تصويت عقابي ضده، زيادة على ذلك كاين المرشح القوي ديال البام سليمان حوليش لي بدا فالحملة اليوم بشكل فعلي، ومرشح الحركة الشعبية سعيد الرحموني لي كان أول من خرج في حملة قوية، ثم مرشح العدالة والتنمية فاروق الطاهري لي كيقود حملة ذكية ومنظمة بشكل كبير، ثم مصطفى المنصوري ديال التجمع الوطني للاحرار لي مازال مابانش للناس ومعول على القبائل لي كانت دائما كتساندو، ولكن هاد المرة خرجات ليه "الزاوية الكركرية" من جنب من بعد ما ترشح الادريسي حفيد الشيخ كركر ورئيس جماعة أفسو وهادشي غايطير للمنصوري ألاف الاصوات، ولكنه كيعتامد على الثاني فاللائحة ديالو الملياردير مصطفى سلامة.
العائد بعد خسارة 2011 محمد الطيبي عن حزب الاستقلال مادايرش شي حملة كبيرة ولكنه عائد بقوة حتى أن خصومه يشهدون بضمانه للمقعد حقاش خرجات معاه بزاف ديال القبائل من بينها أولاد ستوت وزايو وأولاد داوود الزخانين وجزء من رأس الماء.