الملك ممثل الشعب الوحيد لدى الدولة : الحمد الله لي كاين سيدنا لي عارف أن دوك الأقلية المصوتة بالضرورة مكتختارش الناس المناسبين وكيتدخل هو باش يمثل المغاربة كاملين

بزاف ديال الناس كيظنوا أن دوك المتربصين بالملك ودوك لي كيمدوا للملك رسائل فيها مطالب شخصية فراه بضرورة عياشة وباغين كريمات باش يعيشوا بالريع ، ولكن للأسف فالواقع كاين مستثمرين ورجال أعمال وناس من مختلف الطبقات الإجتماعية لي كيرفعوا للملك رسائل تظلم من شي ادارة عمومية أو ظلم نزل بيهم ، ماباغين لا كريمة لا والو، باغين غي حقهم المشروع لي تم التحايل عليه أو سلبه اياهم من قبل أفراد نافذين أو بسبب تهاون الإدارات ، غي فالمواقع الإجتماعية كاين فيديوات ديال بزاف ديال ناس مستثمرين كيتشكاو من شي ظلم لحق بيهم من طرف أحد المسؤولين ومنهم لي ضاعليه رزقوا كاع فخطرة ، وكيحاولوا يوصلوا هاد القضية للملك .
ولكن عمري ماكنت كنظن أن الملك شخصيا غادي يدير خطاب حول هاد القضية ، ربما لأنه ولاتك توصلوا طلبات غريبة من باب أنها عادية ومن حق أي مواطن الحصول عليها ، وولا كيشوف أن أغلب المواطنين لي كيتلاقاوه بالضرورة عندهم مشكل اداري أو قضائي كيطلبوا المساعدة ديالو فيه ، لدرجة حتى هو أصبح كيتسائل بحالنا ، فيناهي الإدارة المغربية من بعد ماتسائل بحالنا على أين هي الثروة .
هاد المرة الخطاب كان فالبرلمان ولكن بطريقة عكسية ، يعني فعوض أن المنتخبين لي نتاخبهم الشعب يوصلوا مشاكل الشعب للدولة وعلى رأسها الملك ، دابا أصبح الملك كيوصل مشاكل المواطن للبرلمان وهاد الخطاب يمكن اعتباره من أكثر المسائلات البرلمانية لي تطرحات فديك القبة ، هاعلاش مكنصوتش ماشي حيث مقاطع للإنتخابات ، وانما حيث كاين سيدنا كيمثلني فقبة البرلمان ، وهذا هو الإستثناء المغربي أي ديمقراطية عكسية ، فعوض يكونوا البرلمانيين هوما صوت الشعب لدى الدولة ويتم الأخد بعين الإعتبار لمطالبهم والأسلة ديالهم ، فالمغرب كاين سيدنا صوت الشعب فقبة البرلمان ولدى الدولة ، ولعكس البعض يعتبره أنه هو لي حامينا من الإستئساد ديال الحكومة علينا .
الحمد الله أن الإرادة الشعبية ماشي هي لي حاكمة فهاد البلاد ، وأن الناس لي ختارهم المواطن عبر الإنتخابات كيستلزمهم مراقبة سلطة فوقية عليهم وأكثر نفوذا منهم ، والحمد الله لي كاين سيدنا لي عارف أن دوك الأقلية المصوتة بالضرورة مكتختارش الناس المناسبين وكيتدخل هو باش يمثل المغاربة كاملين وخصوصا الغير المصوتين ولي كيتيقوا فيه غير هو ، باش ينغز الحكومة والإدارة والدولة بخطابات ثورية بحال هادي تشفي غليل المواطن وترد له شيئا من الإعتبار المفقود عند عتبات الإدارة العمومية