نحن البخوش الموقعون اسفله: كنا عارفين راسنا بخوش و لكن ماشي تال هاد الدرجة عاوتاني!

غاتقوليا ماكانش عندو رخصة ! السبادا ماخاصوش يتصيد فداك الوقت ! واش مسطي هذا لي لايح طناشر مليون فسلعة لي ممنوعة ؟
غانقوليك عند الحق آ سيدي و متافقة معاك.
غاتقوليا هاز السلعة فطونوبيل غير مهيئة باش تهز الحوت فيناهوا الفريكو؟ فيناهي ليجيان؟
غانشد ليك يديك و غاتقولك وييييييي عندك الحق
غاتقوليا داك الحوت كون تباع كان يقدر يسمم بنادم لي غاياكلو.
غانقولك عند الحق عاوتاني.
غاتقوليا القانون كان خاصو يتطبق و تحجز السلعة و خونا يقرقبو عليه باش مايعاودش.
غانقولك قرقبو على دينمو و لي دار الذنب يستاهل العقوبة.
و لكن ماطحنوش فكاميو د الزبل آ صاحبي
ماطحنوش
ماطحنوش فحال البخوش
ماطحنوش كثر ما الزمان طاحنو
وي حنا عارفين راسنا بخوش
و عايشين عيشة البخوش
واش لي عيالاتهم كايولدو فبيبان السبيطارات ماشي بخوش؟
واش لي كايولد ستة ديال الولاد و هو عايش فبراكة كاتقطر عليه و ماكايفكرش ليهم فمستقبلهم ماشي بخوش؟
واش لي مازال مآمن بكلا يتزاد برزقو ماشي بخوش؟
واش لي كايتحاماو عشرة على واحد فالزنقة باش يسلخوه و يمرمدو دينمو حيت ‘زامل' ماشي بخوش ؟
و لي كايتقاتل حدا باب البرلمان باش توظفو الدولة و نهار كايعطيوه شي بيرو فشي مقاطعة كايدخل مع العشرة و كايخرج مع الجوج و لي بغا شي ورقة كايقوليه سير حتى تجي ماشي بخوش؟
واش لي كايمشي لليسي و هو شبعان كالة و كاينقز السور سالت من الحصة ديال لونكلي و كايجي يكتب ليك فالفايسبوك" ولادكم قريتهم و ولاد الشعب جهلتوهم" ماشي بخوش؟
بخوش وي بخوش و سراق الزيت و
گراد من داك الگراد لي كايلصق فودنين الكلاب
الكبار بخوش
وحتى الصغار لي مستفين كي السردين سبعين واحد فالقسم النص مافاطرش و النص ماغاسلش رجليه كاينجحو ب 4 على عشرة و ثلاتة على عشرة و ماكايفرقوش بين المبتدأ و الخبر تاهوما بخيخشات صغار غايكبرو و يوليو بخوش يتزاد على البخوش لي كاين ديجا.
و لكن ماطحنوش آ صاحبي
ماطحنوش
ماطحنش دينمو عاوتاني.
باش تسيفط لينا ميساج بلي نتوما بخوش.
راه و الله تا عارفين راسنا بخوش.
بخوش و مطحون و معجون و طالب السلة بلا عنب
خراو علينا! غفطو علينا !زيدو خراو علينا عاوتاني و لكن ماطحنوناش
راه مطحونين.
و الله تا كلنا مطحونين.