أنا كمغربية سافرة متبرجة مايمكنش ليا نتضامن مع فاطمة النجار واحد السيدة لي باغا ترجع العيالات فهاد البلاد اللور اللور و كاتساهم بهضرتها و محاضراتها وايديولوجيتها فتكلاخ بنات البلاد

فالحرب بين جوج ديال الخصوم فاش كاتجيك المناسبة باش تعطي للخصم واحد الديريكت للوجه يطيح ماينوضش خاصك تعطيها ليه لوجه ديك الساعة وبلا ماتخمم حيت لا تعطلتي و خممتي غاتجي فيك نتا ديك الديريكتة و غاتصدق مشبوح فالأرض كايضحكو عليك الناس.
اليوم تاواحد مايقدر ينكر بلي كاينة حرب بين جوج ديال التيارات فالمغرب، كاينة حرب بين لي كايسميو راسهم حداثيين، الداعين لعلمنة الدولة و المدافعين عن الحريات الفردية و قيم المساواة و الحرية و التيار لاخور ديال الخوانجية المدافعين عن الافكار القروسطية كمنع الاجهاض و منع العلاقات الجنسية خارج اطار الزواج وتجريم العلاقات المثلية، مهم راكم عارفينهم ! دوك أعداء الفرح و السعادة المغوبشين المكوؤبين و المكوؤبات لي لاضحكتي و كركرتي قدامهم كايقولك "و كيف تضحكون و إخوانكم في بورما يموتون كل يوم ؟" الرجال من ذوي الاسنان الصفراء و اللحي النابتة بزغب الفرتون و النساء ذوات البشرة التي لم تتحمر تحت شمس شاطئ تاغازوت أو مير اللفت أو كابو نيكرو … لي مافيهمش لاطراس ديال المايو اللواتي يرون أنفسهن على أنهن عورات ناقصات عقل و دين.
علاش غانضامن مع فاطمة النجار و أنا كانشوفها كاتمثل داك المقولة ديال " عدو المرأة هو المرأة" هضرة فاطمة النجار و لباسها و ايديولوجيتها و أفكارها لي كاتحاول تزرعهم فالبنات من العوامل الأساسية لي غاتخلينا كعيالات اللور اللور فهاد البلاد،علاش غانضامن معاها ضد قانون كايحد من الحرية الشخصية ديالها و أنا عارفة و هي عارفة بلي هي ماكاتآمنش بشي حاجة سميتها "الحرية" أصلا هي لي كاتسمي المثلية "شذود" و "الحب" غواية و الجنس "سعار جنسي" ؟ أنا ماغانضامنش معاها حيت توسامبلومو هي ماعمرها غاضامن معايا غدا و لا بعدو لا حصلت مخشية فشي طوموبيل تانا مع السبعة ديال الصباح ( واخا الاحتمال غير وارد حيت أنا ماشي مسخوطة نمشي تال القمقوم باش نعيش الرومانسية) غالبا غاتشمت فيا فاطمة النجار و غاتقول عليا أني زانية فاجرة من الذين يحبون أن تشيع الفاحشة بين المسلمين و غاتلعني و تلعن سلسبيل واليديا لي بالنسبة لفاطمة النجار لم يحسنوا تربيتي.
هاد السيدة و فحالها بزاف كانشوفهم سباب هاد الحالة المتدهورة لي وصلات ليها المرا فالبلاد ، هضرتها، لباسها، ايديولوجيتها و سياستها كلهم كانشوفهم وسائل كايرضو المرا فهاد البلاد لور لور، واش لي كاتشوف بلي البنت ماخصهاش تهضر مع الدراري فالقسم بعقلها و تستحق نتضامن معاها أنا كمرا بغيت بنتي تقرا مع الدراري و تهضر مع الدراري و تتصاحب مع الدراري و تعيش حياة عاطفية و جنسية سوية. واش لي كاتهضر على البنت فحالا كاتهضر على خنشة ديال الشمرتل كاتباع و تشرا تستحق التضامن معاها؟
كاين واحد المثل مغربي معروف كايقول" باش تقتل باش تموت آ ملك الموت"! هاد السيدة ليوم هي ضحية راسها ! ماشي ضحية نظام ماشي ضحية مخزن ماشي ضحية البام ! هي ضحية راسها و معتقداتها لي دافعات عليهم حياتها كاملة ! هي ضحية للقانون لي بغاتو و بغات تعيش فيه و ماكرهاتش هي كون يتزاد فيه و لي حصلناه مع جمتو فشي دريبة نجلدوه وسط مركب مولاي عبد الله ! فاش كانو الناس كايغوتو على حقوق المرأة فين كانت فاطمة النجار ؟
فاش خرجوا الفيديراليات النسائية كايناديو بالحرية و المساواة و احترام الحياة الشخصية فين كانت فاطمة النجار و صحاباتها ؟ فاش دوك البنات لي تشدو فانزكان على ود الصاية خرجو الناس كايدافعو عليهم فين كانت فاطمة النجار و صحاباتها ؟ كانت كادير محاضرة للبنات فكيفاش يعيشو جنب الحيط مايهضرو مايتكلمو مايعيشو حياتهم مايديرو صحاب و علاقات ؟ كانت كاتشرح للبنات ربعطاش خمسطاش لعام كيفاش يغطيو بزيزلاتهم و سويواتهم و يكحزو جيهت الشرجم لاجلس حداهم شي واحد فالكار و يغوبشو ؟! حيت كايثيرو الفتنة بين صفوف الشباب.
واش غانضامن مع وحدة كاتشوفني أنا و لي فحالي سافرات ! نامصات ! عاريات متبرجات و ربما زانيات … ؟
سمحوا ليا بالزربة كاع المحطات النضالية لي دوزوهم العيالات الحرات فالمغرب باش تكون المرا المغربية مستقلة قارية و واعية و حرة ماحضراتش فيهم فاطمة النجار و صحاباتها ! فا ماتجيوش اليوم تقولو ليا نتضامن معاها حيت هي و فحالها لي خرجو علينا و غايزيدو يخرجو علينا و لي دارها بيديه يفكها بسنيه.