كيفاش البام خربق كلشي. دافع على التنزيل الديموقراطي للدستور وسكت كلشي المحللين وطلع ديموقراطي واضح اكثر من الاحزاب لخرى التالفة

خرجة الامين العام لحزب الاصالة والمعاصرة الياس العماري يوم امس الاثنين ريبات كلشي السيناريوهات. الياس العماري كان واضح وضوح كبير. حنا ماشي جزء من هاد الشي حزبنا جا الثاني ما غاديش يقبل يشكل حكومة واخا يفشل رئيس الحكومة المعين عبد الاله بنكيران "ايلى فشل فتشكيل الحكومة حنا ما نقبلوش. حنا نرفض نتولى الحكومة نهائيا. يقلبو على مخرج دستوري اخر".
هاد التصريح ريب كاع السيناريوهات المحتملة. بين باللي البام انتصر للتنزيل الديموقراطي للدستور. حنا حزب فالمعارضة ما شي ورقة تلعبو بيها. هادي هي الرسالة اللي وجهها للجميع.
هاد القرار اللي كال عليه الياس العماري "راه قرار سيادي" اي ما فرضو عليهم حد في صالح حكومة بنكيران في صالح الديموقراطية في صالح المسار الديموقراطي اللي غادية بيه لبلاد. فبلاد ايلى تكتبات افتتاحية ولا خرج رأي كياخر تفسيرات كثر من حجمو، جات خرجة الياس العماري باش توضع النقاط على الحروف.
محتاجين احزاب بحال البام فهاد الجانب المتعلق بالوضوح بخصوص الحكومة: المعارضة وبخصوص سيناريوهات تشكيل الحكومة: ما كاين سيناريوهات كاين دستور نحترمه
نقطة اخرى للخروج من كل ازمة قد تتفاقم اكثر بخصوص تشكيل الحكومة طرحها الياس العماري امين عام حزب الاصالة والمعاصرة تتعلق بالحل الجماعي. هاد الدستور تواقف عليه المغاربة ولا كان شي سيناريو اخر بخصوص تشكيل الحكومة خاصو يكون ديموقراطي تتواقف بشأنه كل الاحزاب السياسية. هنا زاد سب الباب على اللي كيحرك الكارطات فالخفاء ولا بعيد على الاضواء.
خاص الاحزاب الاخرى اللي مازال تالفة داخلة ما داخلات لحكومة بنكيران تستفد من هاد الموقف الديموقراطي لحزب الاصالة والمعاصرة. لا تبعوه غدا يبان كلشي اما تشكل الحكومة ف24 ساعة او ندوزو لمرحلة اخرى واخا كيبان لي اقرب بكثير لتشكيل الحكومة لان ما يفرق هاد الاحزاب اكثر بكثير مما يقسمهم