المخرج ادريس شويكة يكتب ل"كود": الطابي لحمر ديال مهرجا مراكش مسخ أولى كحل !

ما بين لفتتاح ولختتام لي غادي إكون هاد الليلة، الطابي لحمر ديال المهرجان مسخ ورجع كحل من كثرة لوسخ لي نشروه المنظمين في هاد الأسبوع ! الشي لي جعل من هاد التظاهرة بحال لكنازة في حين كان خاصها تكون عرس كبير.
باختصار تخسرات فلوس كثيرة على نتيجة صغيورة وربما منعدمة كاع : السينما الوطنية ما ستافدت والو لكونها تقصات من لول، تكريم لشخصية مغربية وحدة وماشي في بلاصته حنت ماشي شخصية سينمائية، الجهات (شركات أو أفراد) لي استفدت كثر أغلبها فرنسية، هيآت مهنية مغربية كثيرة حتى هي تقصات بحال الأفلام، الإدارة الفرنسية هي لي متحكمة في كلشي وسي صارم الفاسي الفهري وفيصل لعرايشي، مدير القطب التلفزيوني العمومي (لي عمم فيه غير الرشوة والمحسوبية والزبونية : يعني سياسة "باك صاحبي" الشهيرة) ياالله كيطلبوا باش يبلصيوا صحابهم في لوائح المعروضين في لوطيلات ولعشاوات ولحفلات…
وباش كملات وجملات سي صارم الفاسي، المدير ديال المركز السينمائي المغربي، ما خلى فين كال بصوت عالي بأن الأفلام المغربية ماشي في المستوى ديال مهرجان مراكش، ولكن المدير الفني المحترم برينو بارد ضرب ليه كلشي في زيرو وبرمج أفلام فرنسية أو من إنتاج مشترك فرنسي من مستوى ضعيف بزاف، أقل مستوى بكثير من بزاف ديال الأفلام المغربية لي تعرضات في المهرجان الوطني ديال طنجة !
واش ماشي القمة ديال العبث وخسران المال العام على والو وإهانة كبيرة لبلاد ولعباد ؟!
أنا بعدا ما بقيت فاهم والو وعطيت حماري، ولكم واسع النظر والسلام !
المخرج ادريس اشويكة