اخطر ما قاله شباط. ندم وخاف يوقع ليه ما وقع الفروج اللي كال ليه مول الفيرمة ما يبقاش يوذن وسالاها معاه باش طلبو يبيض. ايلى كان شباط هو الفروج فشكون مول الفيرمة؟

كلشي كان مضبوط اليوم فخطاب حميد شباط الأمين العام لحزب الاستقلال في المجلس الوطني الاستثنائي بالرباط اليوم السبت 31 دجنبر 2016 . ما كانتش بلاصة الارتجال، كلشي تكتب وتقاد. الحاجة الوحيدة اللي سمحو ليه يكولها وكانو عارفينها هي قصة الفروج او الديك كما قال.
طبعا شباط كيعاود تجربتو. كيعتارف. شباط قال باللي مول الفيرمة كان عندو فروج. واحد النهار قال ليه ما تبقاش توذن فالفجر. الفروج كال ليه علاش لخراين كيوذنو. واخا هادا دار اللي كال ليه مول الفيرمة. ما بقاش يوذن. داز الوقت جا عندو قال ليك خاصك تولي تقاقي بحال الدجاجات. دخل وسط الدجاجات. دوز هادي وبدا يقاقي. داز الوقت وجا عندو وقال ليك خاصك تبيض بحال الدجاجات. هنا بدا يبكي وندم وقال كون غير بقيت كنودن.
دابا شباط كيقول للمناضلين الاستقلاليين ولغيرهم. انا نادم انا كنت فروج ديال مول الفيرمة وما بقيتش. غير ما كالش لينا شكون مول الفيرمة اللي كال ليه يخرج من الحكومة ديال بنكيران