ها اكبر خطر كيهددنا: المغرب ايلى بغى يربح فافريقيا خاص هاد العبث ديال تشكيل حكومة بنكيران وبسرعة" قوة الملك وقوة المغرب بالديموقراطية اللي بادينها ولا رجعو التقنوقراط كيف كيروجو شي وحدين غادي يكون خطر على مستقبلنا

بعض اللحظات التاريخية الحماسة كتعمي العقل. كتوقفو على التفكير فهاد اللحظات كتنوض تيارات تدعو الى نوع من الردة. هاد الشي اللي كيتشم من خلال الحديث المتكرر على التقنوقراط وضرورة عودتهم وتقديمهم انهم هم الاصلح للمغرب فهاد اللحظة. هاد الخطاب خطير خطير جدا. ما كيهددش الديموقراطية بل كيهدد مستقبل لبلاد. هاد الخطاب كيقول لكل مغربي كيصوت على الحزب اللي بغى: انت غير كناتتو بيك الفضاء وكنلعبو ليك وكنلوحوه فالاخير.
خدمة كبيرة دارتها الديبلوماسية المغربية او الملك بصفة خاصة باش يرجع للاتحاد الافريقي من الباب لكبير. خدمة كانت واعرة. ولكن هاد الخدمة يستحيل دار بدون دولة فيها احزاب سياسية فيها جمعيات مهنية فيها مجتمع مغربي فيها الانسان المغربي كل في منصبه. غير الاساسي ان الاحزاب المغربية دارت دورها خدمات وفق ما هو مسموح به. من الغباء الاستخفاف بدور اي واحد. حقاش الفرقة باش كتربح راه كلشي ساعدها. تختلف درجة المساعدة ولكن كاينة.
الاحزاب المغربية بكل ما لها وما عليها خاصها تبقى الواجهة لديموقراطيتنا. الانتخابات جابت العدالة والتنمية وعطاتو 125 مقعدا خاص بنكيران امينو العام هو اللي يدير الحكومة وهاد البلوكاج الحقيقي او المصطنع كل حسب توجهه وقناعاته وقربه او بعده من هذا الحزب او ذاك٬ خاصو يسالي. دابا 115 يوم وغادي يتزاد على الاقل شي عشرة ايام حقاش كاينة زيارة ملكية لثلاث دول افريقية: جنوب السودان وغانا وزامبيا وغادي يكون رئيس التجمع الوطني للاحرار عزيز اخنوش فهاد الزيارة.
لا يعقل يبقى المغرب بلا حكومة هادي 115 يوم وكلشي عندو فكرة على اللي معرقل تشكيلها. ما تعتاقدوش باللي لمغاربة اغبياء. خاص مخرج لتشكيل الحكومة
المغرب باش يكون راسو مرفوع فافريقيا وريادي ماشي خاصو يكون ريادي غير فالاقتصاد وماشي التقنوقراط اللي غاديين يعطيونا صورة مشرقة. سياسيونا بكل ما لهم وما عليهم وحقاش عندهم الشرعية الشعبية هما اللي خاصهم يسيرو الحكومة.
كل تراجع عن هاد الشي غادي يكون كارثي على لبلاد خطر عليها. يفتحها للمجهول.
ما غاديش يطفرو المغرب لا جهويا لا اقليميا لا داخليا بردة عن الديموقراطية. غادي يدخل فالحايط. المصيبة كلنا غادين ندخلو فهاد الحيط. هاد الديموقراطية مسار طويل دابا خرج لينا هاد الشي خاص خدمة باش الامور تتطور وكلشي يتكيف مع هاد الديموقراطية. راه يالله كلنا باسم الله