انفراد: شكون الجهة اللي نسفات لقاء بنكيران بالسفير الروسي وحركات الفعفاع من الخلف باش يستقبل نفس السفير ويخرج بيان سبو: تفاصيل حصرية كتبين علاش حكومة بنكيران ما خلاوهاش تخرج

فضيحة سب الفعفاع وزير الخارجية والتعاون =صلاح الدين مزوار= لرئيسه عبد الاله بنكيران في بيان كارثي على خلفية تصريح رئيس الحكومة لوكالة قدس بريس وقال فيه ان روسيا تدمر سوريا٬ ما هو الا انعكاس لاستمرار استهداف بنكيران يقول قيادي في حزبه.
حسب مصدر مطلع ل"كود" فانه كانت هناك اتصالات على اعلى مستوى وتم ترتيب كل شيء من اجل ان يلتقي عبد الاله بنكيران بالسفير الروسي يوم الثلاثاء سادس دجنبر. يعني الامور كانت غادية تصلح. غير اللي كلشي فاجئوا وفق مصدر مطلع ل"كود"٬ هو ان بنكيران نفسه غادي يتفاجئ بلقاء وزير الخارجية ديالو صلاح الدين مزوار بالسفير الروسي في موسكو. بيان الخارجية كال حينها ان اللقاء جاء بطلب من السفير. غير هاد العبارة تحتاج لدقة اكثر واش بصاح كانت. حقاش ما يمكنش لسفير دولة كبيرة يدير هاد الزبلة. عارف غادي يتلاقى رئيس الحكومة ويطلب لقاء وزير الخارجية الا الى كانت شي جهة كتقول ليه ها اللي خاصك دير حقاش ها اللي كيحكم فهاد البلاد وهادي فضيحة اخرى لينا كدولة.
المثير فهاد الملف اللي كيظهر علاش هاد الحكومة مازال ما بانتش هو ان الفعفاع اتصل ببنكيران وكال ليه غادي يدير شي بيان في اشارة الى بيان خامس دجنبر. غير هو يشرح مصدر "كود"٬ ما خبروش بطبيعتو او مضمونو. الصدمة كانت باش خرج وسبو "لا يمكن للمواقف الرسمية ان تكون محط ارتجال او تعبر عن وجهات نظر شخصية". هنا بنكيران تقولب وهو المسؤول على هاد التقوليبة. حقاش كان عليه يشوف البيان قبل ما يخرج لانه يتحدث باسم الحكومة ولا يخلي شي جهة تخرجو. سبق ليه تقولب فبيان "خدام الدولة" اللي سب حزبو وخبروه غير باللي كاين بيان بلا ما يطلعوه على المضمون. فهاديك حزبو ربح حقاش الداخلية والمالية قودوها بمصطلح خدام الدولة وكلشي سبهم وانقلب السحر على الساحر. دابا فقضية روسيا كان الامر متخلف. بنكيران كيتسنى يصايب حكومتو وشي كيتسناه فالدورة. الغريب ان السفير الروسي اللي تكلم معاه بنكيران هاتفيا وفق مصادر "كود" وتفهم والموضوع كان تطوى٬ كان اول من عزا رئيس الحكومة في وفاة والدته لالة مفتاحة.
ها علاش كنكولو ديما عبثية تشكيل الحكومة. حقاش تشكيلها ما واقفش على ارادة الاحزاب وعدد المقاعد بل فيه تعقيدات غير ديموقراطية غادية تقدر تدي لبلاد للحيط يقول مصدر "كود".