خدمة الدبيز. وزارة الاتصال رجعات كطبق القانون بأثر رجعي. تسليم بطاقات الصحافة بصفة صحفي متدرب للسنة الثالثة بسباب القانون الجديد

وزارة الاتصال إما عندها إشكالية عويصة ففهم أن القانون لا يطبق بأثر رجعي، أو أن مشكل حكومة تصريف الاعمال كيأثر على الخدمة ديالهوم.
الوزارة بدات كتعطي للصحافيين المتدربين لي عندهوم الحق ياخذو بطاقة صحفي مهني بطاقة صحفي متدرب للمرة الثالثة على التوالي وهادي عمرها كانت حقاش القانون ينص على أن مدة التدريب هي سنتين والسنة الثالثة خاص تكون البطاقة مهنية.
تعليل الوزارة هو أن الصحفي وحسب القانون الجديد خاصو يجيب دبلوم ديال الصحافة او ما يعادله مع شهادات التكوين معتمدة في مجال الصحافة.
هادشي مزيان ولا غبار عليه غير وكان هاد الوزارة ماعارفاش أن هاد القانون يطبق فقط على الملفات الجديدة لي تحطات من بعد صدور القانون الجديد، أما بالنسبة للصحفيين لي كانوا حطوا ملفاتهوم فنهاية سنة 2014 او 2015 فماشي ممكن تطبق عليهوم الوزارة قانون جديد أو انها غاتكون مرغمة تعطيهوم بطاقة صحفي متدرب مدى الحياة وهذا مخالف للقانون.
كما أن منح بطاقة صحفي متدرب للسنة الثالثة على التوالي هو في حد ذاته مخالف للقانون يعني الوزارة رجعات غير كطبز للخدمة عينيها.