الجامع ماشي ديال الله راه ديال الدولة والدين حتى هو والزفزافي دار بحال هاد الدولة اللي كتستغل الدولة الدين والجامع باش تمرر خطابات سياسية

الجامع فالإسلام منذ نشأته كان بلاصة ديال السياسة وماشي غير ديال دين بوحدو ، وفيه كانت كتناقش أحوال الأمة الدينية وفالغالب السياسية ، وديما كان منبر الجامع بوق للدولة الحاكمة ، وحتى علامات موالات أي ربع للسلطان أو لحكم دولة ما أو الخروج عليها هو الدعاء لها أو له فالمنبر ، ونهار كيبغيو يعلنو الخروج على السلطة لا يذكر اسم السلطان فالمنبر، وهادشي جاري بيه الأمر منذ بداية الإسلام ، وماشي غير الدولة المغربية في شكلها الحالي لي كتستعمل الجامع لتمرير خطابها سياسي ومواقفها من الأمور ، وحتى نوع التدين ديالها.
لذا اقتحام الزفزافي للجامع وتوقيفه لخطبة يوم الجمعة ، لا يختلف عن خروجه في مسيرة أو مظاهرة ضد الدولة أمام أحد البنايات التي ترمز لها ، حيث الجامع ماشي ديال الله الجامع ديال الدولة والدين حتى هو ، وهذا هو الموشكيل هو ملي كتستغل الدولة الدين والجامع باش تمرر خطابات سياسية لي نوعا ما فشكل دولتنا يعتبر خطاب معتدل ولكن فالعمق كيبقى استغلال لمكان عبادة من اجل السياسة ، وطبعا ملي الزفزافي وقف خطبة الجمعة راه دار جريمة كيعاقب عليها فصل قانوني ، لي هو 221 ولي مباشرة من وراه كيجي 222 ديال معاقبة المفطر في رمضان جهرا ، وهنا كيبان كيفاش الدولة كتحتاكر معاقبة كلا الطرفين ، مول الخطاب المتشدد لي رافض خهطاب الدولة فالجامع ، والحداثي لي باغي يعيش حرياته الفردية .
ومن ديما الجامع فالمغرب موضع نزاع ، فحتى أيام انتشار السلفية فراه كانو كينشطوا انطلاقا من مساجد فالأحياء الهامشية ، وهكاك قبل منهم العدل والاحسان والإصلاح والتوحيد ، والعديد من الجماعات لي مرات بالمغرب وكان الجامع بلاصة منين خرجات ، حيث الجامع ماشي غير بلاصة لتمرير خطاب الدولة ولكن بلاصة فين لي بغا الأتباع والمخلصين كيسيطر عليه ، هاعلاش الموشكيل ماشي فالزفزافي حيث قتاحم الجامع أو الدولة حيث كتستغلوا لتمرير خطابها السياسي ، الموشكيل فالجامع فحد ذاتو كمؤسسة ذات بعد سياسي وديني وصعيب السيطرة عليها مية فالمية ، لذا عوض معاقبة الزفزافي حيث قتاحم الجامع أو مطالبة الدولة بعدم تمرير خطابها السياسي فيه ، راه خاص يحولو الجوامع بعد العبادة لمكتابات ودور شباب ومراكز ثقافية.
الصراع عليه بين الدولة والنَّاس غاي يبقى ديما .