آشنو واقع واش كاينة ثورة ضد الملك آش هاد ارتفاع منسوب الوطنية وحب الملك المفاجئ، وهاد الرايات المغربية المرفرة فالصور الخاصة فالفايسبوك ، وآش هاد الهجوم ديال بعض المغاربة بالضرب والشتم والرفس وهم يصرخون عاش الملك ، على مغاربة آخرين متضامنين مع حراك الريف ، وآش هاد الهجومات الجماعية فالتعليقات ديال المواقع الإخبارية ولي عبارة عن رايات ديال المغرب وتمجيد في حب صاحب الجلالة وتحذير من الفتنة ومن أن يصير المغرب كسوريا والعراق واليمن وليبيا والصومال وجنوب السودان وفينيزويلا، وآش هاد الحمى الجماعية ديال الفيديوات على اليوتوب ديال مواطنين جنب صورة الملك يتغنون بحب صاحب الجلالة ، وبالقيادة الرشيدة لجلالته ، وبعد أن يذكرو بلي راه مطيشة بجوج دراهم للكيلو يصيحون جماعة عاش الملك ، خيزو درهم ، عاش الملك، بطاطا خمسة الدراهم عاش الملك ، الدلاح فايت عشرين كيلو عاش الملك ، الصابة هاد العام عاش الملك . وآش هاد الخرجات الإعلامية البهلاونية المختصة بتخوين بعض قيادات حراك الريف ونسبها كل مرة ليمن لدرجة وصلو حتى للشيعة ، لي يشوف هادشي يجبليه الله راه كاينة ثورة فالمغرب ضد الملك وكاين منطقة باغا تنفاصل على المغرب ، أو بدات فالإنفصال ، راه كاملين كنبغيو الوطن ديالنا ( برجات متفاوتة)، ولكن ماشي لدرجة أنه نتوهموا أنها كاينة ثورة ضد الملك وفالواقع مكايناش ، كاين ناس عندهم مطالب بحال كاع المغاربة المهمشين فأغلب مدن المملكة ، هادشي مكيجعلش منهم انفصاليين أو ثوار على العرش العلوي أو باغين يردو المغرب بحال سوريا …الخ. للأسف هو أن الناس لي كينوضوا هادوك العياشة يخرجوا فجأة بدون سابق انذار فمثل الخرجات لي شفناها كيسيؤوا للبلاد وللملك كثر ملي كيدافعو عليهم ، وهادو بالظبط هوما لي خاص توقفهم الدولة على هاد السعار الجماعي ، حيث بهاد الطريقة راه واخا تكون كتبغي هاد الوطن تولي تكرهوا غير باش مايجمعكش حب الوطن مع كوجاك مشجع الكوكاب ، ولا مع خدوج الشوافة ، ولكن وككل مرة باقي بعض أجهزة الدولة خدامين بمسيرات ولد زروال لتجييش جزء من بسطاء الشعب ضد آخر ، بدعوى الخوف من الفتنة، حيث فكل خرجة لهاد محبي الوطن والملك كيبينوا على غباء وبلادة وقلة لحيا لي متليقش بهاد البلاد وبالأحرى بالدفاع عليها ، راه 2017 هادي وهاد الخرجات أكل الدهر عليها وشرب ، خصوصا أنها أصبحث كتوثق بالفيديو وكتنتاشر فالأنترنيت وكتشوهنا كمغاربة كثر ملي كتبين أننا شعب وطني .
