واش مكاين تاواحد بعقلوا يوقف هادشي حيث راه واخا تبغي تتخايل محاكمة سريالية فالقرون الوسطى مغتوصلش لدرجة تحاكم جوج قاصرات على ود قبلة ، الله أودي فيناهو العهد الجديد الدولة والقانون خاص تحمي هاد البنات من جهل الأم ديال وحدة فيهم ماشي تعاقبهم

فالحادثة ديال اعتقال قاصرتين بممارسة الشذوذ الجنسي ، كاين تلاتة ديال الجرائم خاص يكونوا عندنا قوانين كتعاقب عليهم ، أولا جريمة عدم الدخول في سوق الكر ، وهادي الى كان شي قانون كيعاقب عليها فراه أغلب المغاربة غيكونوا فالحبس ، وهي لي قام بيه البرهوش لي صور القاصرات كيتباوسوا فالسطح ، الجريمة التانية ولي أفضع هي الأم لي عيطات للبوليس على ود التصاور أو الفيديو لي شافت وهو لي قدماتو كدليل ، هاد الأم لي كان خاص تعاون بنتها وتحتارم الميل الجنسي ديالها ، هادشي فحالة كانت متلية بصح وماشي غي كتلعب مع صاحبتها وصافي ، هاد اللعب الكثير فالمجتمعات المحافظة أيام الطفولة بين البنات مع بعضياتهم والدراري مع بعضياتهم ، ويمكن تاخدو نمودج الطلبة ديال الجوامع كمثال ، وفعوض هاد الأم تناقش مع بنتها واش بصح عندها ميل اتجاه البنات ، وتحتارم هاد الميول ناضت بلغات بيها ، وهادي جريمة وهنا فين خاص القانون يتدخل ويحمي الطفولة المغربية من الأباء لي ماواعيينش بحال هاد السيدة .
الجريمة الأفضع هي الإستجابة الفورية لرجال الشرطة واعتقال القاصرتين ورميهم فالسجن مع المجرمين ، والتهمة أنهم باسوا بعضياتهم ، والكارثة أنهم فالحبس غادي يدوزو للسطاج الموالي وغادي يفوتوا البوسان لهيه ويقدر بالإكراه كاع ، ثلاتة ديال الجرائم فضيعة ترتاكبوا بحق قاصرتين لحد الآن وفاللخر القاصرتين هوما لي كيتعاقبوا ، ويقدر يكون لحد الآن ترتاكبوا جرام خرى فحقهم ، بحكم أن المونتيف ديالهم سابقة فالمغرب ، وقليل بل نادر ، والدليل هو أنه مكاينش العزلة فحي النساء ، على غرار حي الرجال لي فيه مكان مخصص بالمثليين ، وحتى المجتمع مكيدينش المثليات بقدر ادانته للمثليين ، الموشكيل لكبير هو أن البلاصة فين سيفطوهم يتعاقبوا على سلوك داروه اختياري بيناتهم وبالتراضي، غادي يتمارس عليهم بالإكراه فبعض الحالات ، هادشي بالإظافة الى الآثار النفسية لي غادي تبقى معاهم ، وزيد عليها الطامبو ديال مدوزات الحبس لي غادي يبقاو جارينو معاهم طيلة حياتهم.
كنتخايل المكالمة لي دارت الأم للبوليس باش يجيو ، آلو البوليس واك واك عتقوا الروح ، أجيو راه لقيت بنتي كتبوس صاحبتها فالسطح ، والبوليس جاو كيجريو وعتاقلوا البنات بالزربة وقدموهم ، وعمروليهم محضر ، وتعرضوا على وكيل الملك وسولهم واش بصح بستوا بعضياتكم وجاوبوا بالإيجاب حيت البوسان ماشي جريمة ، وقرر بكامل قواه العقلية وطبقا للقانون أنه يسيفطهم لإعتقال الإحتياطي على مايتعرضوا على المحكمة بتهمة البوسان ، وهيئة القضاة المكونة من تلاتة ديال القضاة ولي كيتعرضوا يوميا حداهم قضايا ديال عتاة المجرمين ، غادي يكون ملف هاد جوج بنات بين دوك الملفات وغادي يستدعيهم ويبدا يسول فيهم ، والمحامي كيدافع على حقهم فالبوسان والنيابة العامة كتطالب بأقصى العقوبات حيث باسوا بعضياتهم ، ومن بعد غادي يتم الحكم عليهم ويسيفطوهم للحبس يتقاسموا الشامبري مع الراقصة لي بانت فبرنامج أخطر المجرمين ولي قتلات راجلها وقطعاتو وشوات ليه راسوا ، ومع مي خدوج لي وكلات لراجلها السم ديال الفيران وهربات مع صاحبها ، ومع لالا فاطمة القوادة لي كانت كتقود بنات صغار للأجانب ، آش هاد العبث أش هاد المصيبة فهاد البلاد ، واش مكاين تاواحد بعقلوا يوقف هادشي ، حيث راه واخا تبغي تتخايل محاكمة سريالية فالقرون الوسطى مغتوصلش لدرجة تحاكم جوج قاصرات على ود قبلة ، الله أودي فيناهو العهد الجديد ، الدولة والقانون خاص تحمي هاد البنات من جهل الأم ديال وحدة فيهم ، ماشي تعاقبهم .