مذكرات لاجيء ف بلجيكا، الحلقة 11 : نورين…

—
اذا سولتيني دابا غادي نقول لك ان الحب غي تخربيقة اخترعناها حنا معتقدين اننا بيها نقدرو نتصاجبو مع البنات للي كيامنو بهاد الشي غي مقابل شوكولا و دبدوب و شوية د الشعر ..و سواء استعملتي هاد الشي و لا استعملتي تيندر و لا واتساب او اي وسيلة اخرى باش تقطع الوعود للي نتا براسك كنتي معتقد انها صادقة ..و للي بانت لك نتا عادية جدا و طبيعية لكن غادي تبان خارقة و مجنونة لاي واحد صاحبك عادي سيليباتير و لا "فحال خاها"..مثل العبارات للي ضروري انك تكون تا نتا قلتيها ..و لا نتي سمعتيها: "غادي نبقا معاك ديما" او " ما نقدرش نعيش بلا بيك", ف الحقيقة واحدة و هي انه غي تفاعل كميائي فحالو فحال الشراب غي هو تاثيره اطول ..عنده اثار خايبة ملي كتفيق منه و ف ذروته كيخليك تعمل حاجات ما كانش المفروض انك تعملها و نتا ف كامل قواك العقلية.. فحال انك تندمج فالدور ديال البطل و تعمل فيها شجاع و ما تعلقش ..و تظل واقف ب بسالة على السكة باش تواجه قطار الحياة للي غادي يخلي دار بوك بعد دقائق متسلحا باللون البينك و الوردي..بدون ما تلتفت ل صوت الخطر فالخلفية للي اساسا نتا كتسمعو موسيقى هندية..تعزف ليك نتا ..شبيه الممثل شاروخان ف موهاباتين..رغم اننا فالاخير بطريقة او باخرى كاملين ك نوصلو لنفس النتيجة..صوت اصطدام و شبه جملة اخيرة: اح.
هاد الشي اذا سولتيني دابا, لكن قبل ف ديك الايام الباردة ..ملي صردت لي نورين -ذات يوم- راسها على غير العادة مبتسمة فالفيديو بطريقة مشبوهة ..لاننا كنا مدابزين ديك الساعة.. و قالت لي انها خسها تقول لي شي حاجة ..ثم بعدها ملي ما جاوبتش لاني ماشوفتش التلفون.. الحت بواسطة عشرات ديال للي ابيل..و طن من المساجات المتسائلة و الايموتيكونات الصفراء ..ثم الحمراء الغاضبة .. و بعدها " نوفل جاوبني" .."فينك؟" و "مشغول واقيلا" و "صافي خليك مع صاحبتك و سلم عليها" و " تا انا غادي نخرج مع صحابي تهالا" و ملي كانت باقي كتكتب لي اني "حقير حيت ما جاوبتش" و اني " ما كنسواش..و انها ندمانة حيت ضيعت حياتها مع واحد فحالي" و "سالينا"..شوفت التلفون و جاوبت " مالنا؟" ..ف قالت لي انها كتبغيني بزااف و انها عندها لي خبر غادي يفرحني بزاف..عيطت لي فيديو و اول حاجة قالتها لي ملي شافتني جالس كئيب باللحية للي ما حسنتهاش منذ اسابيع ..انها ما تقدرش تعيش بلا بيا..فنوضت كنتاكد من راسي ف المرايا.
قالت لي انها صافي ..بدات كتجمع الحوايج و غادي تجي باش تقرا و تسكن ف مدينة فالينسيان على الجهة الاخرى من الحدود البلجيكية- الفرنسية..و ان عمها للي كان ف عطلة د العيد لكبير عندهم ف المغرب و غادي يجيبها معاه ..تكفل ب كولشي.. و انها ما غاديش تستنا مازال الكومبيس ديال المغرب للي هو ضروري للطلبة د المغرب للي ناويين يقراو ف فرنسا حيت هي جايا غدا و خسها غي يومين د الطريق و ترجع ساكنة على بعد غي مئة كيلومتر مني..ما تيقتش ..كنت جالس مع رضوان و مصطفى فالقهوة الحقيرة كنتناقشو ف شحال المتر كاري كيخرج من كيلو د الماريوانا..و شحال غادي نربحو اذا زرعناها منزليا و واش من الممكن اذا تشدينا نضحيو ب مصطفى للي ما كانش عندو مشكل يتحبس اذا عطيناه مقابل مادي مناسب حيت على الاقل غادي يعيش ف حبس بلجيكي ب طريقة شرعية.. تا جبرت راسي سمحت فيهم و رجعت للدار و جالس حدا الحيط باش نشد الويفي د الجيران المبيراطي مزيان و كنكتب بالزربة فميسنجر و كنقولها ..انا للي بلا وراق..و انا للي اذا شدوني فالحدود غادي يصردوني مباشرة باش نصبح جالس لغد ليه ف مطار بن بطوطة د طنجة .."شوفتي؟ قلت لك الامور غادي تكون احسن" و هي كترد عليا " تا حاجة ما غادي تفرقنا دابا..فوقاش تجي عندي؟"
بعد ثلاثة ايام, كنت ماشي عندها ..
—————————————–
الحلقات السابقة:
– ( الحلقة الاولى : http://bit.ly/2s3GmGK )
– ( الحلقة الثانية : http://bit.ly/2rAO2mR )
– ( الحلقة الثالتة : http://bit.ly/2rXOVp7 )
– ( الحلقة الرابعة : http://bit.ly/2sERrxk )
– ( الحلقة الخامسة: http://bit.ly/2rVT9xW )
– ( الحلقة السادسة : http://bit.ly/2skjpll )
– ( الحلقة السابعة : http://bit.ly/2rdle40 )
– ( الحلقة الثامنة : https://goo.gl/Xo4Vox)
– ( الحلقة التاسعة : http://bit.ly/2scqZvW )
– ( الحلقة العاشرة : http://bit.ly/2s5mRPP )