مذكرات لاجيء ف بلجيكا: الحلقة 7: الحراك

—
فالايام الاولى البروكسيلية كنت كنفيق فرحان فالشقة ذات الارض الخشبية, محمد كيمشي للخدمة و كنبقا انا فالدار بوحدي كندور على اطراف رجلي كيف تعلمت باش ما نصدعش الناس للي تحت..ديور المغاربة ف بلجبكا خايبة عكس سياراته و هذا كيرجع لان سياراتهم ستشاهد ف المغرب و ديورهم لا ..كنعصر قهوة و نجلس نفطر بين الحاسوب و التلفازة.و ملي كنطلل من الشرجم و كيبان لي الاتوميوم ..كنقول لراسي اني اتخذت القرار الصحيح ملي جيت ل بلجيكا..حيت قريبي كان باقي ما خرج من مرحلة الكرم المغربي ديال الثلت ايام و مرحلة الحصار الاقتصادي و سياسة الارض المحروقة كان باقي ماجا وقتها….كنت ف ديك الايام القصيرة تلاقيت المحامي و اكد لي ب 50 اورو استشارة انه من الممكن ان بلجيكا حسب الشائعات تحل الوراق ف شتنبر ..كل ما يلزمني نستنا شهرين مخبع بدون ما يشدوني البوليس و ما عليا اذا خرجت الا نحاول نتحاشا الاماكن للي هما فيها بزاف..خرجت من عندو فرحان و ملي هبطت نشد مترو باش نرجع فحالي للدار جبرتهم البوليس ف حملة تفتيشية دزت منها و انا علاين تجيني سكتة قلبية ..نورين كانت كتقول لي ديما انه عندي خوف فطري من البوليس و اني كنتخلع ديما ملي كنشوفهم ..حتى ملي رجع عندي حق الاقامة فيما بعد ديما كنحاول ما نشوفش فيهم ..يمكن حيت علاقة المغربي بالبوليسي ف بلادنا ديما كتتوقع منها الشر ..و ان البوليسي احسن حاجة تتوقعها منو انه يقول لك خلص قهوة.
رجعت كننعس على الامل و كنفيق ف الصباح و كنحس براسي فحال شي دوق اوروبي مفلس ..خصوصا لما كنخرج بشورت و صندال ل شارع "هوبا" نشري كوميرا ب "نانوت سانت" كيف ما كينطقو البلجيك رقم 90 ..او جريدة لوسوار و كنتلاقا فالطريق العواجيز البلجيك ف حدائقهم جالسين كيستمتعو بالشمس ..كانت العمليات الارهابية باقي ما وقعت بعد ف باريس ..و كنت مجرد شخص ب ملامح مغربية سكن حداهم ف كيقولو لي بونجوغ ..و احيانا كانو كيجبدو معايا تا الهدرة و كنبقا نعاود لهم بالفرنسية ديالي اننا حاربنا من اجلهم ف الحرب العالمبة الثانية و ان مقبرة جامبلو شاهدة على 2200 مغربي مات من اجل بلجيكا.. هي الصراحة ماتو من اجل فرنسا ..لكن من يهتم ..حيت هما عاوتاني ماكانوش كيدخلو معايا فالتفاصيل باش نقولهم ديك بلا بلا ديال اليساريين ديال انهم غي ضحايا و اصلا ما جاوش ب خاطرهم و ان السلطان هو للي صردهم يموتو ف حرب ماشي حربهم ..لان المغاربة حتى داك الوقت كانو باقي ما خداوش لقب: ارهابيين..اه كانو البلجيكيين كيشوفونا ك حراكة..تجار مخدرات او لصوص او حتى ك طحالب كسولة تستفيد من نظام المساعدة الاجتماعية بانجاب اكبر عدد ممكن من الابناء غي باش تصرد فلوس و تبني دار فالمغرب و تمشي لو فالصيف بسيارات فارهة و تستفز للي باقي ماجا باش يفكر يجي..لكن ما كانوش كيحتاطو منا ف ديك الساعة غي حيت ماشيين حداهم هازين صاك ..هاد الشي غادي نكتشفو من بعد ..ملي غادي تفضل سيدة عجوز انها تقطع الشارع الخاوي الا مننا انا و ياها و السيارات.. ف الضو الاحمر ..خوفا من انها تستنا الضو الاخضر حدايا…و ملي غادي يوافقني الدغبوش على ان البوليسي فحفلة عيد الملك كان تابعنا ملي دخلنا بين الجمهور البلجيكي المتجمهر كيستنا تمر سيارة الاسرة الملكية.
فالايام للي انتهت صلاحية الفيزا و ما بقيتش كنخرج حزنا و تا خوفا.. كان رضوان هو صديقي الوحيد بعد الدغبوش ..و اذا كان الدغبوش كياخدني ف زيارات للمتاحف باش نبانو متحضرين زعما ..ف رضوان ب بنيتو الجسمانية للي تخليك ملي تشوفو تجري كان كيرجعني للواقع.. كثر ملي كيسمي المحل للي حدانا ب " البقال ديال الكوار" و كيقول لي و هو كيشرب هينيكن ان اللحم د ماكدو حرام ..و اننا انا و ياه للي جينا من المغرب كبار ما عندناش امل هنا من غير اننا نبيعو الماريوانا ..حيت حنا محتقرين حتى من طرف المغربيات د هنا للي اول سؤال كيطرحوه بغرض الزواج ..حيت هما كيتصاحبو مع كاوري لكن كيتزوجو من مغربي حلالا ..هو : واش تزادتي هنا ..و اننا حنا ف نظر الدراري المغاربة للي خالقين ف بلجيكا اما "بليدار" اما "خوروطو" ..
رضوان كان كيجي عندي مرة مرة غي باش نخرجو و نجلسو ف واحد القهوة حقيرة حدا الدار كتعمر دائما بالعجائز للي كيجيو يغنيو كاراوكي..و رغم ان بزاف د الاحداث غادي توقع و غادي يتبدلو بزاف د الحاجات فيا و فبلجيكا و العالم ..الا ان الحاجة الوحيدة اللي ما غاديش تتبدل و غادي نظلو مواضبين عليها هي اننا طول مدة اقامتي ف بروكسيل غادي نظلو نجلسو ف نفس القهوة ف نفس الوقت ساكتين ف اغلب الوقت و كل واحد شاد تلفونو او كندخنوا ..كنت عارف بعد ما طبقت عليه خطة تطبقت عليا ف زمن سابق..و خليتهم جالسين هو و محمد مع تلفوني للي كيسجل شنو كيقولو و مشيت للطواليط انه كيجي عندي اكراما فقط لصاحبو محمد و انه تا هو كيتافق معاه و كيشوفني حاس ب راسي و غريب الاطوار و منعزل عن العالم ..لكن بعد ما غادي يمر الوقت غادي نقدر نبدل رايو شوية خصوصا لما غادي يعرف انه عندي مع "الانترنت" كيفما كيسميه و اني نقدر نجيب لو كودات د ويفيات يتكونيكطا بيهم فالدار باطل…و غادي نرجع عزبز اكثر لما نانسطالي لو تطبيق تيندر و نحط لو تصويرة فوتوشوبية عامرة بالفلترات..
ثم جاء شتنبر..
————————————————
روابط الحلقات السابقة:
– ( الحلقة الاولى : http://bit.ly/2s3GmGK )
– ( الحلقة الثانية : http://bit.ly/2rAO2mR )
– ( الحلقة الثالتة : http://bit.ly/2rXOVp7 )
– ( الحلقة الرابعة : http://bit.ly/2sERrxk )
– ( الحلقة الخامسة: http://bit.ly/2rVT9xW )
– ( الحلقة السادسة : http://bit.ly/2skjpll )