اليوم الحد. مخداماش. فقت لقيت راسي بوحدي. بوجمعة مشا لتارودانت يحضر عرس خوه. خلا ليا ربعالاف ريال و قاليا تهلاي فراسك. مرة مرة كنت تننكر و نقوليه كن كونا مجوجين و نديرو ولاد يعمرو علينا الدنيا حسن من هاد السكات اللي كيقتل. بلا بيه دبا مكنحسش غي بالسكات، كنحس أن كلشي ميت.
شنو يمكن يدير الواحد نهار الحد بوحده فهاد البرتوش خاوي هاكا؟ المشكلة أني ماشي واحد، وحدة..
فاش تنخلي بوجمعة بوحده ونمشي لدارنا تيلقا مايدير، تيصبح ناعس و يدير ما ياكل و يخرج يتسركل و يسكر ويعيش حياته، تيعيط ليا فالتليفون مرة مرة يقوليا را كلشي بخير، حتى كنرجع عوتاني. أنا شنو غندير بلا بيه، عكزانة نجمع الدار، معنديش لمن نطيب، يلاه نمشي للحانوت نجيب خبزة وكارو. الحمام عاد مشيت ليه. صحاباتي كاملين كيكونو خدامات السيمانة كاملة و دبا يلاه يجلسو مع رجالهم ولا ولادهم، ولا تا اليوما كيخدمو. أمينة كتكون ناعسة فهاد الوقت حيت السبت بالليل أهم ليلة د الخدمة كتكون الدنيا شاعلة عندهم فالبار.
شحال هادي ماهدرت مع ختي، مشيت شريت كارط ديال التلفون باش نهدر معاها من دك التيليبوتيك د الشارع. تاهي عمّراتني بالهم و الغم و البكا، كنت عارفاها غتعاودلي غي فضايح راجلها وولادها، وايني ميمكنش منسولش فيها.
ملقيتش لكارط عند الحانوت اللي فدربنا، مشيت تا للشارع الاخر، مكنحملش مول الزريعة، كنقوليه عطيني كارو كيبقا يشوف فيا بحالي معرية قدامه، ما فيا ماندابز و بوجمعة مكينش، مشيت عند مول الساكا،هانية بنادم ممعقدش..الدراري كيعطيهم وهوتيضحك، امراة تاخد منه كارو يشوف فيها شوفة ناقصة، كاملين بنادم. كتعجبني غي أمينة، كتشري كاع دكشي من سوبر مارشي كبير، مكين اللي يشوف فيها ولا تشوف فيه. دزت من حداه و انا راجعة، واخا مدار ليا والو خنزرت فيه. و مشيت للتيليبوتيك.
أصعب حاجة على المراة هي فاش ميكون عندها والو بحال ختي عيشة، و يكون راجلها حاضي غي السكرة و العيالات. عشت عندها ست شهور كانوا اخيب ما دوزت. زاد عدفني فالرجال، و قلت عمرني ما نتجوج. بقيت كنقولها حتى تحققات ليا و ها حنا عايشين بخير واخا غي مصاحبين. كتبقا فيا، واخا هي مجوجة بيه و كلشي، مقدراش تعيش دكشي اللي كنعيشوه حنا. مدخلاتش دنيا، مقراتش، تجوجات صغيرة،ولدات صغيرة، خلات مها و دوارها ومشات بعيد. و لكن المراة كتصبر، كتصبر على كلشي خاصة اللي عندها الولاد. ديما كتقول ماشي مشكل هما غيضيعو. إما غيتحرمو من مهم و يبقاو عايشين مع مخلوق غي كيسكر مكيبقا فيه عقل، و لا غيعيشو بلا باهم، ولا عاشو معاها شكون غيصرف عليهم؟ كتكمدها فقلبها و تسكت..
كيضربها، معليش..كيضرب الولاد، معليش..كيخسر كاع الفلوس فالكارو و الشراب و البنات..كدير راسها معرفاش، مشافتش، مشمات شريحة البارفانات، و مشافتش قاميجته البيضا عامرة بالعكر حمر..هدشي كله المراة كتقدر عليه، وايني فاش الراجل كيجي و يقوليها بغيت نتجوج غتسني ليا الورقة، دماغها كيطير، تمشي تفسد واخا، و لكن تجوج..بحال شي حد قالوليه غتموت دابا.
بقات كتبكي و قالتلي مور هاد السنين كاملة، بغا يتجوج، مور هاد الصبر كامل باغي يجيب امراة تشاركني فيه و فداري و فولادي و فرزقي. إيوا معندكش رزق آختي، معندكش رزق و معندكش زهر. هدشي علاش غي مصاحبين، حسن من تجوجنا.
كيبان الجواج شي حاجة كبيرة، كلشي كيتجارى عليه، و تا حد ما مرتاح..كلشي كيطلق، كلشي فالمحاكم، كتشوف الناس بالعرام فديكشي د التيليفيزيون باش يتصالحو مور ما يدابزو بالعلالي قدام العالم كامل. ماعرت شنو خسنا. واش العيب فالمراة و لا فالراجل و لا فيهم بجوج، و لا يمكن حنا كولنا زايدين على الوقت فهاد البلاد، مالاقيين ناكلو مالاقيين نعيشو معارفين لاش جينا و لا وقتاش غنمشيو.
ماعندي ما نقوليها، باش غنصبرها؟ مكيعجبنيش نكدب على الناس، قلتليها تصبر حيت عندها ربعة د الولاد و تسني ليه، حيت لا ما سنات اليوم غتسني غدا، لا مسنات بالخاطر غيكون بزز، لا ماشي بالنكير بالعصا، مكينش شي راجل كيبغي شي حاجة و مكيديرهاش، المهم يكونو عنده فلوس.
البرتوش ميت، رجعت جلست نتفرج فالتيليفيزيون، خملت، عجنت، عيطت لبوجمعة تا هو.مجاوبش و تلفونه مطفي، أيكون ودر السلك تاني، و لا معندوش شي ساروت فين يعمر التليفون، متنخافش عليه، عرفاه راجل و قاد بشغاله. و فاش كيكون غادي لبلادهم واخا كنتوحشه بزاف، كننعس بخير، عرفاه
بقيت كنفكر فيه، و كنفكر فعيشة و راجلها، ميكونش بوجمعة تا هو كيعرف شي امراة اخرى، ميجيش شي نهار يقوليا سيري بحالك مبقيتش بغيتك بغيتها، الدنيا علماتني ان كلشي ممكن، هي على الاقل فدارها مع ولادها مغيجريش عليها، أنا غنبقا بوحدي تاني، معنديش فين نسكن، خدمتي كتجيب جوج ريال، نقدر نرجع عند أمينة واخا هي السكنى معاها مقودة حيت فيها بزاف د الصداع، وايني هاني واكلة ناعسة شاربة، كي ندير ننسى بوجمعة؟ كي ندير ندوز كاع ياماتي بحال هاد الحد خاوي؟ معقلاش على حياتي قبل منه، و ميمكنش نفكر أن ممكن يجي شي نهار ميكونش معايا فيه..
و كيما قالت عيشة، كي نعيش من بعد مور ما هرسني؟ مور ما قاليا مبقتيش صالحة، غنبدلك؟
المراة كتصبر على كلشي، كتصبر على شماتة يصبحها ويمسيها بالعصا كي تيقول بوجمعة، كتصبر على جهنم فالدنيا، ولكن فاش كتلوحها و تشرك معاها امراة اخرى، كتولي بحال الصابونة ريحتها زوينة، وايني كتزلّق ! كريمة.
