سكوب. عبث غادي يضحك علينا العالم وفضيحة كبيرة اكثر من كلب مدام الكتاني فلارام. بيلوط هاز معاه 230 مسافر كاين جاي لكازا من المدينة داز حتى لجدة بلا خبار حد لهاد السبب اللي غادين تصطاو باش تعرفوه

علمت "كود" من مصادر مطلعة ان رحلة جوية غريبة داروها مسافرين مغاربة الاثنين 19 يونيو الاخير. احد الركاب قال ل"كود" ان تذكرته كان فيها المدينة بالسعودية لكازا مباشرة واذا به مثل كل المسافرين هبطو حتى لجدة عاد كلمو الطريق.
حسب مصدر مطلع ل"كود" من السعودية فان الرحلة بالفعل ما كانش فيها لا جدة ولا عمة. وفق مصدر اخر ل"كود" فان السبب غريب عجيب مثير "البيلوط هاز معاه 230 مسافر وغير الطريق وهبط للتحت باش يهز جوج بيلوط صحابو او خدامين معاه ماشي مهم. المهم انه ضحك على كلشي".
وفق مصدر ل"كود" مقرب من الخطوط الملكية المغربية بالسعودية فان هاد الهبطة ما كانش فراس لا الادارة لا حتى حد. وكيفاش دارت وواش ممكن فزمن الارهاب ووو تبدل طيارة اتجاهها؟ "هاد الشي ماشي شغلنا هاد الشي شغل ادارة لارام هي اللي خاصها تقلب. المهم هاد الشي وقع". المصدر قال ل"كود" ان تغييرا مثل هذا كيطلع غالي بزاف على اي شركة من شركات الطيران.
دابا كلشي تجمع فهاد الفضيحة اللي كتبين ضعف الادارة الجديدة وشوفو كيفاش شي مستشارين كيقتارحو ناس ما فيدهمش باش ينتاقمو من ناس خدامة مزيان.
هادي فاتت بزاف بزاف فضيحة كلب مدام الكتاني اللي طلع فالدرجة الاولى. الكتاني مول التجاري وفا اللي ما دارو مع مدامو والو. يمكن عطاوها شي وسام حقاش سمحات لشي تافهين يحيدو ادريس بنهيمة