تحليل. واش الملك غادي يشارك فهاد القمة الافريقية ولا اللا؟ تسناو حتى الاثنين وزوما مقاتلة باش تعرقل هاد العودة وها كيفاش المغرب لاعب ماتش ديبلوماسي كبير وربما اوعر ماتش منذ وصول محمد السادس الى الحكم

يتواجد الملك محمد السادس في اثيوبيا. كلشي موجد باش يشارك فقمة الاتحاد الافريقي. المغرب من خلال تحركات الملك محمد السادس دار خدمة هادي 16 عام فافريقيا باش يوجد هاد العودة بقواعدها. غير هاد الشي ما كانش ساهل. المغرب نجح فاختراقو للانجلوساكسونيين بافريقيا اللي كنا ناسينهم وفتت بعض الاحلاف التاريخية بحال نيجيريا الجزائر جنوب افريقيا ولكن مازال الرافضين لعودة المغرب الداعمين للبوليساريو خاصة حلف الجزائر جنوب افريقيا.
هاد الشي كيلقى تفسيرو فموقف زوما مفوضية الاتحاد الافريقي. السيدة دارت التطبيق المتعسف لما ينص عليه الاتحاد الافريقي بخصوص عودة او انضمام اي عضو. كلشي كيذكرها دابا بكيفاش دارت مع جنوب السودان والسرعة باش قبلوها وكيف كتصرف مع المغرب. زوما بدات حربها مع المغرب من نهار حط طلبو. تسنى فترة طويلة بزاف بزاف باش غير ترسلو للدول 52 الاعضاء. هاد الشي قلق المغرب وخرج بيان من خلال وزارة الخارجية عاد السيدة رسلاتو. من بعد خلات الاجوبة او ردود الدول عندها. ناضت قالت اودي خاص الرئيس اللي يدير الرد ماشي وزير الخارجية ديال الدولة. هاد الشي ما كاينش فقوانين الاتحاد الافريقي ولكن ختارت التصعيد. المغرب كان عندو هاديك الساعة نسخ من ردود اكثر من النصف اي العدد اللي كيخول ليه العودة.
المغرب وجد لهاد القمة اللي كاينة يومي 30 و31 يناير اي الاثنين والثلاثاء٬ كان خاص زوما اللي هي غير مفوضة الاتحاد تحسم انضمام المغرب باش يقدر الملك محمد السادس اللي وصل لاثيوبيا يحضر لاجتماع القمة صباح امس الجمعة. قبل هاد الوصول كان الفعفاع وزير الخارجية وياسين المنصوري ديال لادجيد =المخابرات الخارجية= تلاقاو مع زوما. هاد السيدة خرجات بيان مريب غريب. كتقول فيه كلام في النسخة الفرنسية للبيان واخرى بالنسخة الانجليزية. قالت بلللي الطلب المغربي توصل بالعدد الكافي =الحد القد= وفالنسخة الانجليزية تحدثت عن عدد الاصوات المتحصل عليها. ولكن اللعب الكبير اللي دارتو زوما هو رسلات البث فالطلب المغربي الى اجتماع القمة اي انه في جدول اعمال القمة وغاديين يحسمو فيه رؤساء الدول الاعضاء. هاد الشي ما داروش فالسابق.
طبعا المغرب ماساهلش ليهم. اليوم فالعشية داير الملك محمد السادس حفل كبير لرؤساء الدول الافريقية بحال شي عرس قبلي للانضمام. جواب منو على هاد العقبات اللي دايراها الجزائر وجنوب افريقيا. كما سيعقد الملك محمد السادس لقاءات على انفراد مع عدد من رؤساء الدول الافارقة. الملك مشى للدار لكبيرة اي الرؤساء باش يبين للجزائر ولجنوب افريقيا قيمة المغرب.
زوما باغية الرؤساء باش يوافقو على الانضمام تخلي المغرب يتسنى 6 اشهر باش يكمل اجراءات الانضمام. هاد الشي عايق بيه المغرب وخدام باش يريبو عليها. باغي يدفع الرؤساء يحسمو فهاد الامر خاصة انهم اسياد الاتحاد الافريقي. هاد المعركة القانونية اللي باغية دخلهم ليها زوما يقدرو يحسمو فيها هاد الرؤساء.
المعركة مازال مستمرة. المغرب عندو الاسلحة الديبلوماسية الكافية باش يربح زوما. هاد الاسلحة هي شراكاتو علاقاتو مشاريعو اللي دارها فافريقيا طيلة 16 سنة. اسلحة جعلاتو نموذج ربما الوحيد فافريقيا للتعاون جنوب جنوب وكلشي رابح لا استعلاء بلا تبعكيك بلا موقف استيباقي استعماري.