واش خص الضحايا يكونو "حمارات" مسعورات ولا مصورات بالفيديو باش ياخذو حقهم؟

—
داكشي الي وقع لديك الحمارة دسيدي قاسم راه ماشي غير قصة نتمازحو بها راه بالعكس هاذيك بمثابة دعوة لقراءة للمجتمع و تعقيداته.
نذكروا بان ذلك الحدث كان كيخص15 مراهق اللي غتاصبو واحد الحمارة مسعورة؛ و تم نقلهم للصبيطار حيت تعاداو. الحمارة بطبيعة الحال راه قتلوها.
الصحف الوطنية تداولت الخبر و ركزت على انه و لله الحمد راه الدراري تلقاو العلاج و لا خوف على المغتصبين و خاصنا نتهلاو فيهم باش مايعاودوش يغتاصبو شي حمارة و لا حاجة اخرى.
هاد الحمارة كانت غتلقى الخير فالمؤسسة الفرنسية ديال الممثلة الفرنسية "بريجيت باردو" المعروفة بالدفاع عن الحيوانات الا عزمات على مقاضاة الجناة واستفسار الجهات المسؤولة على القطاع الحيواني في المغرب على حقوق الحيوان المغربي.
و لولا السعار لما انكشفت هذه الفضيحة.
و بعدها ببضعة ايام وقعت حادثة استغلال جنسي اخرى؛ كتخص حالة اعتداء 5 مراهقين على واحد الفتاة في الطوبيس. تفضحات هاذ القصة لان وقعو تسريبات لفيديو مصور لهذه الجريمة و فبحال قصة الحمارة؛ كتقرا تعليقات بعض المغاربة و اراء جيران و وعائلات المغتصِبين لكي طالبو من المسؤولين نتهلاو فهاذ الدراري و راه ماشي لخاطرهم.
و لولا الفيديو لما علمنا عن هذه الحادثة و لما تم تقديم هؤلاء المراهقين المجرمين امام القضاء.
شحال من وحدة تغتاصبات و شحال من وحدا فضلات تنتاحر حيت مادوا عليها حد؛ و حقها انتُهِك بلا رحمة و لا شفقة؟ و لا حيت مصوروهاش و دارو فيديو على قبلها..فين كايكونو هاد الفاعلين الجمعاويين و المسؤولين الوزاريين؟
أو أن المراة المغربية غير حمارة مامسعوراش و اللي جا كيركب عليها ؟؟