ها ثمن تجيبو بحالو: باش يكون عندك رئيس حكومة اسمه ابن عرفة قتل حزبو وقتل السياسة يولي الحدث هو يصلي بالقبض

فالمغرب جابو ابن عرفة للحكومة خرجو على السياسة خرجو على المسلسل اللي كنا غادين فيه. المثال الباين اللي كيوضح على المستوى هو النقاش اللي اثير بشكل مبالغ فيه على طريقة صلاة ابن عرفة الى جانب الملك محمد السادس. كاليك صلى بالقبض. يصلي بيه ما يصليش بيه هاد الشي ماشي مهم يا عباد الله. الخطير هو فين غادي بينا طريقة تدبيرو للحكومة او غيابو الشبه التام عن الحياة السياسية. بحال شي ضيف جابوه ما عارفش اش يدير. لا شخصية لا حضور لا قرارات تبين باللي راه على رأس الحكومة. النتيجة الاهتمام بطريقة الصلاة ديالو.
اللي غادي يكون فرحان هو اللي خطط يجيبو. السيد كان فاشل فشل كبير باش دوزها على رأس وزارة الخارجية وجابوه لرئاسة الحكومة عارفين باللي ما يمكنش يطفرو. الخاسر فهاد البيعة والشرية هو لبلاد. يولي الدخول السياسي ملخص فهاد الصلاة. لبلاد محتاجة للديموقراطية. محتاجة لمشاريع مجتمعية تضارب وتنوض الصداع باش المغرب يتقدم ديموقراطيا. السكون والفراغ خطير وخطير بزاف