حدث الاسبوع: البوليساريو تدباح ديبلوماسيا او عندما انتصرات الديبلوماسية المغربية وضربات من التحت. العدالة والبيروفية للانفصالية خديجتو المختار: انتي منتحلة صفة ديبلوماسي وما يمكنش نلغيو قرار منعك دخول التراب البيروفي

قرار اخر من القضاء البيروفي يشكل ضربة قاضية ديال بصاح للديبلوماسية البيروفية. يتعلق الامر بالحكمة العليا بليما التي اعلنت امس الجمعة عن رفضها دعوى الانفصالية خديجتو المختار بالغاء قرار منعها دخول التراب البيروفي. باش نعرفو اش وقع نرجعو شوية الاحداث. خديجتو المختار من قيادة البوليساريو. قاليك عندها شي انشطة ديبلوماسية فالبيرو. المشكل انها عندها جواز سفر اسباني اي ما محتاجاش للفيزا باش تدخل لهاد البلاد ولكن تدخل ليها كسائحة ماشي كديبلوماسية. حقاش البيرو من التسعينات قطعات علاقاتها الديبلوماسية مع الجبهة. وصلات للمطار عاقو بيها جاية للسياسة بلا ما تخبر السلطات بلا ما يكون عندها الصفة. بقات فمطار خورخي تشافيز بليما 18 يوم.
فهاد الايام لا وزارة العدل ولا وزارة الداخلية ولا وزارة الخارجية حملوها. كلشي بالاجماع قالو ليها انتي اخترقتي قوانين الهجرة فهاد البلد وما معتارفينش بيك ورجعي فحالك او دخلي كسائحة. مع الوقت حتى خيار دخلي كسائحة ما بقاش. جا حكم المحكمة نهار الاربعا اللي فات فيه: خرجي علينا من بلادنا. ركبوها فطائرة ديال الخطوط الجوية الايبيرية =الاسبانية= ورجعوها.
الفيلم ما سالاش وهنا غادي يجي حكم قضائي اخر كان ضربة شرشمات البوليساريو ديبلوماسيا وغادية تكون مرجع يخدم بيه المغرب مستقبلا. اش فيه ان ما تقدمت به خديجتو من طعن ما شادش. قرار منعها من دخول التراب البيروفي ساري المفعول. ماشي غير هاد الشي. الحكم فيه " في حالة "الاجانب" وكقرار سيادي لكل دولة ان تتخذ قرارات معللة بخصوص دخول مواطنين لاراضيها من عدمه" وزاد ففقرة اخرى "ان بسودو سفيرة =اي منتحلة صفة ماشي ديالها" خديجتو المختار ما يمكنش ليها تدخل مستقبلا لهاد البلاد.
هاد الشي اللي وقع وهو انتصار كبير كبير كبير للديبلوماسية المغربية ما جاش وطاح. كاين سفير للمغرب فليما اللي هو يوسف بلا دار خدمة معتبرة ومعاه طبعا فريق ديبلوماسي ومعاه الخارجية. هاد الناس حرثو وزرعو وتسناو حتى نبت وجا وقت الحصاد اليوم. استغال من خلال جمعيات الصداقة من خلال البرلمان من خلال اشكال اخرى للتعاون مع دولة ما عندنا معاها لا نشاط اقتصادي ولا غيرو بحكم البعد الجغرافي وغياب روابط تاريخية.