تجار الدين لي ديما كيزايدو على الناس بالاخلاق والعفة والصيام كيديرو فضايح مايقدوش الجنون اديروها

—

هاد الايام شاغلة الراي العام الافتراضي والواقعي قضية شيخ ورجل دين ولي هو شخصية عامة ومعروف فالساحة، وكذلك محسوب على تيار السلفية، ووصلات القضية كما هو معروف للقضاء، وهو الوحيد فالاخير لي عندو الحق يحكم فيها، لكن بصفتنا كتاب للراي العام فمن حقنا تناول وتحليل القضية من مختلف الزوايا والابعاد.
اولا من بعد ما خرجات القضية لعلن ولراي العام، حاول الشيخ انه ينكر ولخص القضية غير فالخطوبة وانه ماكينش زواج طالما انه ماعندوش عقد، لكن الغريب فالخرجة الاعلامية الاولى لشيخ قال بلي كان يرقي السيدة لي عندو مشكل معاها من جني "يهودي"، وصراحة غير مفهوم علاش جني "يهودي" واش احتقار لليهود، اولا محاولة اللعب على العاطفة الدينية لراي العام؟ اولا ربما الشيخ بغا يرجعنا للقرون الهجرية الماضية ، ولي فيها قصة معروفة من التاريخ الاسلامي، وهي قضية اغتيال الصحابي سعد ابن عبادة فاش الصراع حول الخلافة بين الصحابة، ولي تلصقات في قضية قتل سعد ابن عبادة لجني ماعرفناش واش هاد الجني يهودي ولا لا…..
ثانيا ما زاد الطين بلة هو الشيخ بصفته شخصية عامة وقدوة للعامة، تورط فزواج غير قانوني بدون عقد ولي مزال مافهمتش صراحة اشنو الفرق بينو وبين الزنا؟ والغريب فالامر ان الشيخ كل مرة كان كيزايد على العلمانيين باسطوانة الاخلاق وضد العلاقات الرضائية خارج عقد الزواج، بل حتى انه مؤخرا سيد خرج ففيديو كيغني مع بنتو نزل عليه باشنع النعوت والاوصاف….
ثالتا واخيرا موضوع الرقية الشرعية ولي مؤخرا كترو محلات ماعرفناش ما محلها من القانون؟ وهاد الناس لي كمارسو هاد المهنة منين جايبين هاد العلم، مع العلم انه فيها تعنيف وكاين من يستغلها لاغراض جنسية، وواش كاين مراقبة لهاد الناس، وواش كخلصو الضريبة اولا الجنون لي كيديرو ليهم الافراغ معفيين من الضريبة؟ بخلاصة تجار الدين لي ديما كيزايدو على الناس بالاخلاق والعفة والصيام كيديرو فضايح مايقدوش الجنون اديروها…..