فايسبوك فرش ماستر الله. الفيزازي وسيكس ساخن وقحاب واتساب اش كيجمع بيناتهم

مؤخرا فايسبوك دار واحد الأوبسيون فين كيبانولك اكثر كالمات كيبحتو عليهوم الناس لي فالبلاد ديالك. فالمغرب لي هو بلد مسلم ومحافظ كيطلعو من بعد كلمة الفيزازي (الأب الروحي ديال المغاربة) كالمات كلها جنسية: "سيكس ساخن"،"سيكس 2017", "قحاب واتساب"، "فيدييو" xxl و زيد و زيد من مسخ…
هاد السكيزوفرينية لي عايشين هي لي مخلية الشعب مكبوت والزنقة المغربية غير آمنة للمغربيات، وهي علاش التحرش داير خبلة.
فاش كنهدر على التحرش مكنعنيش بيه السيناريو ديال "سمحيلي راك عجبتيني، واش يمكن ليك تعطيني نرمتك؟" وفاش كيسمع "لا" كيفهم راسو وكيزيد (هادي ظاهرة جد عادية كاينة فالعالم كامل)، كنعني بيه بنادم لي كيقنطها بيك، لي كيبقا لاصقك ملي كتخرجي من داركوم حتى كتوصلي عند مول الخضرة، بنادم لي فاش كتقوليه "سمحلي راني مامهتماش" كيشبع فيك سبان و يقدر يضربك كاع، بنادم لي عمرك فحياتك ماشركتي معاه حتى السلامو عليكم وكيدخلك ب "اشنو مانديروش فيه ازين؟" و بنادم لي بلا ميهدر بلا مايتبع كايدوز من حداك كيضرب هاليك بتخويرة و كيزيد بحالا الشارع خلاهليه باه ونتي غي ملكية ديالو غادية فيه.
بزاف ديال الناس، فاش كتهدرلهوم على التحرش والقهرة لي عايشين العيالات كيجبدوليك العذر ديال: "ان الله يحب العبد الملحاح"، المرا خاصك تبقا تلح وتلح عليها باش عاد كتقول اه. وااااا محمد، واااااااسي محمد "لا" راه كتعني "لا" مكاين لا عبد ملحاح لا والو! داكشي كيتسما التحرش، وفبلاد كتحتارم راسها راك تدخل عليه للحبس. وحتى لا كانو كاع واحد النسبة قليلة من العيالات فيهوم هاد اللولة ديال "نقوليه لا باش تجيه اه حلوة" الله يجازيكوم بيخير ماتردوهاش قاعدة، وتطبقوها على المغربيات كلهوم، حنا ماشي تلاجات خارجين من وزين وحدة كنخدمو بنفس الطريقة.
للأسف كنعيشو فمجتمع ذكوري و مزوجين كيعتابر الفضاء العام خاص بالرجال ولا مشات حتى دخلاتليه المرا بحالا كتنتاهك ليه الحرمة ديالو وكتقيسليه الذكورة ديالو وهنا كيوضعليها شروط ديال كيفاش خاصها تكون فهاد الفضاء: كيفاش تلبس، فوقاش تخرج وتدخل؟ فين تمشي؟ فين تكلس؟ شنو دير؟
بغيت غي نفهم شنو هو المفهوم ديال فضاء عام عندنا فهاد البلاد؟ واش كنقصدو بيه فضاء ديال المغاربة كلهوم ولا فضاء ديال الراجل بوحدو وغي مسلفو للمرا؟