لمغاربة وثقافة الدم والعنف. اللي وقع فمراكش كيبين تعطش لمغاربة للدم كيصورو فيديوهات لواحد مقتول بدم بارد وحتى ابن عرفة اللي ما كنسمعوش فقضايا مصيرية خرج وكيهدر وكلامو صدق كذوب

كاين واحد التعطش عند المغاربة فالمواقع الإجتماعية للإحداث الدموية، لدرجة ولاو كيمارسو عملية تناقل صور وفيديوات الدم والعنف بواحد النوع من الإحتفاء، بحال ديك اللعبة ديال هانتومة حتى حنا ولينا مقودين، هاهي أولى ملامح طريق العظمة، هاهو داكشي ديال الأفلام ولينا كنعيشوه فالواقع، وكيما شفنا صور الضحية بدمياتو والفيديوات لي تصورو من بعد العملية ديال إطلاق الرصاص فمراكش هوما أكثر حاجة متداولة دابا ، لدرجة رئيس الحكومة لي ماسمعناش صوتو فقضايا مصيرية كيعيشها المغرب، حتى هو أدلى بدلوه فهاد الحادثة.
مثل هاد الحوادث فايت وقعوا وبزاف ومنهم ماهي أبشع من هادي ، غير نواحي مراكش وبالضبط فالبرابيش كاين واحد السيد مافيوزي كان مضارب مع عصابة خرى قتلاتليه واليديه بجوج ، وديما كنا كنسمعوا على حوادث اغتيالات بطرق المافيا خصوصا فالشمال وفمنطقة ولاد يوسف ، وفطنجة كانت وقعات حادثة مشابهة ، حقا العدد كيبقى قليل ، ولكن الإختلاف لي كاين حاليا هو التوثيق ديال مثل هاد الحوادث ، وهاد إحتفالية الدم لي كتطرى من بعد كل حادثة، لدرجة كتحول صور جثت الضحايا لمادة للتندر.
واخا التشرميل يوميا ومعاناة المواطن مع صعوبات الحياة بشتى أنواعها ، إلا أن هادشي ولا روتين يومي مولف بيه بنادم ، بل ولا كيعاني من الملل كاع ، وفحياتو كيعيش فقر فالأحداث ولو غير لكسر الروتين ، وطبعا كنا شفنا الفيديوات الساخرة لي كانت تصورات فمحيط قهوة أركانة بعد الإنفجار ولي ظهرو فيها دراري كيقلدو معلقي قنوات الأخبار ، وداك النهار بنادم بالظبط كان مجوق باش يشوف حدث إستثنائي ويعيش لحظة تاريخية يبغي يعاود عليها ماشي باش يتأسف للضحايا أو للبلاد ككل لي غادي تضرها مثل هاد الواقعة الإرهابية.
هادشي نيت لي شفنا ليوم شاب فمقتبل العمر ، من بعد لحظات من اختراق قرطاسة لأرسه ، بنادم واقف قبالتو وكيصور باش يتشارك فالمواقع الإجتماعية، وماشي يهدر على الأمر كحدث مأساوي وأنما كحدث إستثنائي ، وهادشي كيبين أن المغاربة على سبة وقتلهم الملل وقلة الأحداث وروتين الحياة القاتل ، والأفق المسدود ، وولاو بغاو غير معامن .