فعوض يكونوا رجال التعليم هوما موالين العقل هاهوما بعض منهم كيأكدو أنهم لا يقلون تبرهيشا على دوك البراهش وخدامين معاهم بنفس منطقهم وسلوكاتهم شوهني نشوهك والضحية فهاد الحرب هو التعليم

واحد النهار وأنا تلميذ فالخامس إبتدائي ، كنت فالدار كنقاد شي لعبة بموس ديال الخضرة ونسيت درتو فلاتروسة ديال الأدوات ، وخديتو مع الغد ليه للمدرسة ، فالقسم حليت لاتروسة وهو يبان الموس ، شافو الدري لي كان كالس حدايا مشا قالها للأستاذ صدقي واحد من الأساتدة الله يعمرها دار والجديين ولي كيقريو مزيان فمدرسة سيدي محمد بن عبد الله ، جا عندي سولني آش كندير بيه قتليه راه غير نسيتو وصافي ، خداه مني وقالي غدا جيب ولي أمرك وكمل الدرس عادي ، الامر مخداش من الحصة حتى جوج دقايق ، فالغد جبت الام ديالي هدرو على آش واقع وشرحاتليه الامر ، عطاها الموس ، وداز الأمر بلا مشاكيل بلا قوة الهدرة ، من غير انني مابقيتش كنهدر مع داك البياع لي كان كالس حدايا .
نفس هاد الحادثة تقريبا وقعات فمدرسة إيسيل فمراكش ، الفرق هو ان هاد المرة التلميذ حصل بجنوية فالكارطابل ، وتم تصويره من طرف المعلمين ديالو وشهروا بيه فالأنترنيت ، والحادثة خدات بعد كبير ، وتم شيطنة التلميذ والهدرة عليه كمجرم متمرس ، والدري مجرد طفل ، وكما تم شرح الحادثة من بعد ، التلميذ لقا هاديك الجنوي فواحد الجردة دارها فمحفاظتو باش يديها للدار ، وهذا تصرف عادي بالنسبة لأبناء الاحياء الشعبية والفقيرة ، كتلقى شي حاجة باقا صالحة كتديها للدار كترضى عليك مك ، الموشكيل هنا ماشي من التلميذ لي تصرف بمسؤولية وبرائة اتجاه دارهم ، الموشكيل فهادوك المعلمين لي صوروه وشوهوه قدام المغرب ، بدون أدنى حس من المسؤولية .
حاليا بحال الى كنعيشو حرب مضادة يشنها بعض رجال التعليم على التلاميذ لشيطنتهم وباش يبينو أنهم مجرمين صغار غير قابلين للتعليم وخاص الدولة تتدخل تديهم تلوحهم أو تسلح رجال التعليم لمواجهة هاد التلاميذ الجانحين ، حقا كاين حالات ديال تلامذ هاكة وكاين حالات ديال رجال تعليم تاهوما معتدين جسديا وجنسيا ونفسيا ، ولكن كيبقاو حالات قليلة وهادشي مكيعطيناش الحق نجمعوهم فخانة وحدة ، غير هو لي واقع دابا فعوض يكونوا رجال التعليم هوما موالين العقل وهوما التربويين والبيداغوجيين ولينا كنشوفو منهم سلوكات صبيانية بحال الى كيردو الصرف للتلامذ ، وكالسين غير كيصورو ويتشكاو ويتباكاو ، راه تصور طفل وتتاهمو بأنه كيشكل خطر وتشوه بيه المغرب كامل يعرفو ، راه لحقتي بيه ضرر وهذا اعتداء على هاد الطفل مكاينش فرق بينو وبين اعتداء ديال تلميذ بالضرب على أستاذه ، راه هنا حتى المعلمين دخلو فمنطق التبرهيش والشيطنة ديال العدوة المفترض ، هادوك راه تلامذكم ونتومة جزئيا مسؤولين على سلوكاتهم ، راكم ماشي فحرب معاهم ، فعوض يكونوا رجال التعليم هوما موالين العقل هاهوما بعض منهم كيأكدو أنهم لا يقلون تبرهيشا على دوك البراهش وخدامين معاهم بنفس منطقهم وسلوكاتهم شوهني نشوهك ، والضحية فهاد الحرب هو التعليم .