ياه على بلاد. واحد ما فيدوش من موقع "الماجيدي" وجابوه للجنة التحكيم وعطى لشي صحافي خدام معاه جائزة للصحافة. باغيين بزز يقنعو لمغاربة بقيمتهم وهما ريحتهم عطات

هادي ما يمكنش تكون الا فالدول المتخلفة. لجنة تحكيم للجائزة الكبرى للصحافة فيها شي وحدين من العهد الحجري منهم واحد كيكتب فموقع الماجيدي 360 وداروه عضو فلجنة التحكيم. قضية الماجيدي ماشي من عندنا. راه اللي خدامين فهاد الموقع واللي خدمو فيه ومشاو كانو ديما كيقولوها. اللي حاطينو فالواجهة كيقول عليه "مون باطرون" فجلساتو الخاصة
اللي خدم معاه فوكالة الانباء الفرنسية كيعرفوه مزيان. شي وحدين بلا خبار وزير الاتصال والثقافة كيلعبو وراه كيديرو اللي بغاو. المشكلة ماشي فتعيين هادا بل فانو فلجنة وعطى جائزة لنفس الموقع. داتها شي حد مناصفة مع الصحافية في هسبريس ماجدة ايت لكتاوي.
كيفاش يكون واحد من اللجنة ويعطي لشي حد خدام معاه فالجائزة. هاد الشي شوهة كبيرة. وبغيتو الناس تشارك فهاد الجائزة وعلاش وباي وجه. المهم يخليوها ليهم يديرو بيها ما بغاو.
تحقيقات مهمة جدا دارت فمواقع ومتخصصة وبالفرنسية تستحق تربح. غير المواضيع ديالها كتعصب شي سكة قديمة متخلفة فوزارة الاتصال.
هاد الشي اللي دار اليوم شوهة للبلاد اما هادوك اللي لعبوها ما عندهمش لوجه يحشمو. زايد على هاد الشي كولو جا ابن عرفة وجاب معاه شي وزرا ديالو.