سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
كاينين الرجال لي كايخدمو معاهم غير الرجال فحالهم وكايرفضو يخدمو معاهم العيالات غير حيت هوما “عيالات” و هادي تاهي ظاهرة منتاشرة بزاف و لكن قليل لي كايهضر عليها حيت كلشي مركز مع العيالات لي كايوصلو للمناصب بالنعاس مع الباطرون
فالوقت لي بزاف ديال الناس كايهضرو على العيالات لي كايعطيو زكهم باش يوصلو للمناصب ( الله يسهل عليهم ) و على دوك الرجال لي كايعطيو للعيالات المناصب حيت كاينعسو معاهم بالمقابل ! كاينة واحد الظاهرة تاواحد ماكايهضر عليها ! و واخا كاينة و فارضة راسها فبزاف ديال الميادين ! “دوك الرجال لي كايعاونو غير بعضياتهم” الله يحضر السلامة و الله يبعدهم على گاع العيالات العاملات!! و هاد القضية غاتلقاوها فگاع المجالات لي كاتعرف حضور كبير للرجال فيها فحال الميادين العلمية و الخدامي لي فيهم تقنية عالية : الوحدات الصناعية مثلا ! ايه ديك لاصوليداريتي ماسكيلين ! التضامن الذكوري ! لي كايخلي سعيد يحط السيفي ديال أمين صاحبو و يهضر ليه مع الباطرون باش يدخلو يخدم و مايحطش السيفي ديال شي بنت للباطرون باش مايصحابوش راه صاحبتو و باغي يدخلها تخدم ( دمدومة)! داك التضامن لي كايخلي براهيم يتعاون مع السطاجير رشيد و يفهمو و يعطيه وقت و يهمل السطاجيرة رشيدة حيت لاداها فيها و عطاها وقت غايبان عنيبة و لا تعاون مع السطاجير الذكر غايبان” رجولة”! داك التضامن لي كايخلي بعض المدراء و المسؤولين لي خازنين ورا النضيضرات و الگرافاطات و الفرونسي و لونگلي واحد العقلية ذكورية مخززة كاتشوف انه المرا ” كيما كان الحال مامحتاجاش للخدمة حيت عندها الراجل و لا الاب لي يصرف عليها ” في حين الراجل محتاج يخدم باش يصرف على دارو و عندو مسؤولية ! اذن لاكان قدامهم راجل و مرا عندهم نفس التجربة و الكفائات غايفضلو يخدمو الراجل على المرا! و لا الراجل مثلا لي كايفضل فليكيب و لا السيرفيس ديالو فالعمل يخدم غير مع الرجال حيت العيالات كايشوف فيهم ” كايعياو دغيا” و لا ” كايحشمو” و لا ” غايطيحو ليه الشيفر” و لا ” فيهم فريع الراس” ! باغي المقاتلين لي يعيط يخدم معاهم تال نصاصات الليل فالبيرو و لي يتلاقا معاهم فالقهوة ….و كايشوف بلي ” المرا” ماغاتصلاحش ليه لهادشي ! في حين كاينين بزاف ديال العيالات مقاتلات تاهوما و تعول عليهم ينضيو ليك الخدمة ! كاينين بزاف ديال الرجال دايرين مافيات بيناتهم ! شي كايطلع شي و شي كايعاون شي و شي كايوري لشي و بالعكس كايشوفو فهاداك لي غايخدم معاه بنت و لا هاداك لي غايعطي وقت لسطاجيرة و يشرح ليها ” حميدة” “دمدومة” ” ضحية ديال البوسي باور” ! انا شخصيا على اعتبار اني حتى انا مرا خدامة ، كانشوف بلي هاد القضية ديال العيالات لي كايوصلو للمناصب بعطيان الزك للباطرون كاينة غير فدوك المجالات لي ماكاطلبش تقنية عالية و شي خبرة كبيرة، كاينة فدوك الخدامي لي البروفيل ديالك فيهم منو عاااداااد لامابغيتيش نتي تخدمي غاتجي وحدة اخرى تخدم و هادشي لي كايخليك معرضة للاستغلال المادي و المعنوي و حتى الجنسي حيت فقانون العرض و الطلب فاش كايولي العرض يفوق الطلب الثمن كايطيح ! اما فالمجالات لي كاطلب تقنية عالية كاينة الظاهرة العكسية ديال الراجل لي كايفضل الراجل على المرا ! المهندس لي كايفضل يخدم مع مهندس فحالو مثلا ! و التقني لي كايفضل يكون معاه تقني فليكيب ديالو ! و الاطار المالي لي كايفضل يجيب اطار مالي فحالو يخدم معاه حيت غايتفاهم معاه ! كاين لي مايقدرش يخدم معاك كمرا حيت شبعان عقد نفسية و ماقادش يحط دوك الافكار السلبية لي عندو على العيالات فالدار قبل مايجي للبيرو و باش يهني راسو كايفضل يخدم مع راجل فحالو ! و بجوجهم ! سوا هاداك لي كايعطي البوسط لشي وحدة ماكاتستاهلوش غير حيت كاتعطيه ينيك و لا هاداك لي كايفضل يخدم معاه راجل غير حيت ” راجل فحالو فحالو” ! بجوجهم خاص مهم شي كوردة مرطبة فالما و الملحة ربعاوعشرين ساعة و تبقا عليهم هاك بالاك هاك بالاك للمساطة تايطلبو منك الله و شرع ! حيت بجوجهم بعادين على مبدأ الاستحقاق و المردودية ! آ سيادنا راه ” لوميريت” خاص يكون هوا الحكم فسوق الشغل ! و عدم الالتزام بيه من طرف المشغلين و ارباب العمل كايخلي بزاف ديال العيالات اليوم فسوق الشغل يديرو الخدمة مضوبلا و المجهود مضوبل باش يثبتو لبوقلوة انهن قادات و يعول عليهن و و الله ماغايطيحو ليه الريتم ! و كاتلقاها فيها ليغيگل و اول نهار شادها الوجع و ضاربة بونستيل و واقفة على الخدمة حسكة كاتنضيها ليك ! و تلقاه ما فيه لا دم ماكايجيه حق الشهر و طااالق باقلو فالبيرو و طالق شي ماتش فبين سبور فتيليفونو كايتفرج فيه و خاشي صبعو فنيفو كايجبد الخنونة و يكورها و يلوحها …! كاتفضل تخدم الراجل على المرا ! وا ها الراجل ! طليه دروك !
