واش البنات المنقبات كايشوفو راسهم أحسن من البنات لي طالقين شعرهم ؟ داكشي علاش غي كاينوض عليهم اللغط و كاتلقاهم كايتنابحو " علاش ماتشدوش ماليات الدجين و تشدونا حنايا"

مؤخرا بانت التصويرة ديال واحد البنت منقبة فالفايسبوك و كايگولو بلي جرا عليها مدير الثانوية بسباب اللباس ديالها و كالعادة اللحايا كايولولو " لك الله يا وطني" "ضاعت فيك العفة يا بلدي". لي ثارني شخصيا فردود الفعل ديال الناس على داك الحدث بعض النظر عن واش صحيح و لا لا هوما التعليقات ديال شي أخوات منقبات صحابات " اميرة بحجابي " و " بنقابي أفتخر" و من يدور في فلكهن من لحايا من قبيل " علاش يحبسوها هي و مايحبسوش دوك البنات العريانات لي كايجيو بالدجينات للمدرسة؟" " ياك !؟ هاد البنت العفيفة تحبس و دوك لي كايجيو بالشعر مطلوق تخليوهم يدخلو".
طبعا حتى شي بنت ماكاتمشي عريانة للمدرسة و هادشي كايبقا فإطار التصعيد الروائي لي كايعطيوه اللحايا عشرة لزيرو، و طبعا فالمدارس كاملين كاتلقا واحد الشروط مفروضين فالهندام ديال التلميذ و حتى الدراري كايمنعو عليهم الشورط وسط المدرسة و الكاسكيطة وسط القسم.
بعيدا عن هاذ القصة، المشكلة الحقيقية هي النظرة لي عند المنقبات على العيالات " المتبرجات" ويلي ويلي ويلي حي على احتقار !كاتحس بيهم كايطلو علينا من شي برج عالي ديال العفة و الطهرانية مقلزين غا هوما فوق منو و حنا لتحت قحبات موسخات شايطات ! و غي لي دوا معاهم كايجبدو البنات المتبرجات ! ماليات" الصايات و الدجينات و الديكولطايات" و مالنا حنايا ! و مال صحابات الدجين ! فحالا صحابات الدجين و الصايا هوما لي دايين ليهم النص فالورث.
كاينة واحد النظرة دونية عند المنقبات و المحجبات للبنات " السافرات" لي كايسميوهم "متبرجات" معريين شعرهم ! كايشوفو راسهم أحسن منهم حيت هوما لابسين الحجاب ايه واخا بزاف ماگايگولوهاش هاكا طاي طاي و لكن كايفكرو فيها و كايحسو بيها و فاش كايتحككو ففحال هاد المواقف كاتخرج ليهم الهضرة لي مخبينها فگاشوشهم و كايغطيو عليها بديك " لا ! تقدر تكون سافرة احسن مني و اقرب مني إلى الله" آآحياني عليكم آ العفريتات! بالنسبة ليهم هوما محترمات أكثر و عفيفات أكثر و أقرب إلى الله من المتبرجات تبرج الجاهلية الأولى، حيت دايرين الزيف راه ماخاص حد يقرب ليهم و ماخاص حد يهضر معاهم، و حيت دايرين داك الزيف خاصهم معاملة خاصة و كاينين لي كايمشيو بعيد و كاتحس بيهم فحالا ماكرهوش نهزوهم فالعمارية و ندورو بيهم " فرحي يا لاالة و سعدي يا خيتي ! نقبت بنيتي و حيدت اللومة عليا"
آ نوضي يا تا نوضي ! الحجاب ديالك سوقك هاداك هادي خاصك تفهميها اين فوا بوغ توت ! درتيه سوقك مادرتيهش سوقك ! ماغادي يتزادنا فالدخل الخام ! ماغادي نسددو ديون خارجية ماغانصبحو الصباج نلقاو الحليب سانطرا دايز فالروبينيات، و الزيف ديالك ماكايجعلش منك احسن من البنت لي طالقة لينا سوالفها ! و ماكايعنيش انك اكثر احتراما و لا عفة و لا طهارة منها ! راهم بزاف دايرين الزيف و كايغشو فالشباكية كاتگولك دايراها بالعسل الحر و هوا غا السكار و الما لاديتيها من عندها مع العضة كاتخلي فيها شي ناب مغروس ! و بزاف دايرات النقاب و كايخونو ! و كايكذبو ! و كايهربو للعيالات بفلوس دارت…
داكشي علاش خاصك تكالمي يور تيتس ففحال هاد المواقف و ماتبدايش تشيري بالهضرة ذات اليمين و ذات الشمال لي كاتبينك انسانة اقصائية غبية محتاجة تحط من مكانة امرأة مختلفة عليها في نمط العيش و التفكير باش دافع على راسها.
لقاي لراسك شي طريقة اخرى من غير " علاش مولات الدجين" و عطي التيقار لمولات الدجين لا ضرك الدجين نوضي لبسيه تانتي! حيت الدجين غا لباس عادي كايلبسوه العيالات فالجابون و الكونغو و الشينوا و ماريكان عكس النقاب لي ماشي غير لباس عادي بل هو لباس كايمثل ايديولوجية ظلامية كاتشوف المرأة عورة ماخاصهاش تثير الراجل لي مشيييكيين لاحول له و لا قوة غير كايبان ليه شي دجين و كايبدا تابعو عاو عاو عاو …