المغرب مازال مافاهمش الفرق بين الفلوس والسياسة فافريقيا…والفرق بيناتهوم كبير

المشكلة فالعلاقة بين المغرب و افريقيا هي كاينة واحد الهوة كبيرة بين السياسة ديال الدولة لي باغا تستثمر و تربح الفلوس فافريقيا و سياسة بعرور اتجاه الافارقة لي ماعلابالو لا بيورانيوم لا بذهب لا بسوق استهلاكية ! هوا كايشوف فعوازة غا الجوع و الصنان واحيدها ليه نتا من فمو و قولو حنا افارقة.
سهام بارودي كود ////
على هامش داك الموضوع ديال انضمام المغرب للإتحاد الافريقي…
المغربي باش يهضر عليك على شي عزي و كايبغي يبان حضاري و ماشي راسيست عوض مايقولك" عزي" كايقولك" ! افريقي" ، تلاقيت مع واحد الافريقي ! هضرت مع واحد الافريقي قراو معانا شي افارقة و هاد القضية تقدر تسمعها من بزاف ديال المغاربة من مختلف الشرائح الاجتماعية لي بالنسبة ليهم افريقيا ديال "بصح" هي عوازة و هوما كايشوفو روحهم " أفارقة" و لكن على "مضض" ، وي افارقة و لكن بويض شوية (واخا ماشي شي بيوضة) افارقة ماكاياكلوش المشاش، افارقة ماعندهمش المجاعة… المغاربة كايعتابرو راسهم ماشي "افارقة" ديال بصح ! غا الخريطة لي جامعاهم مع افريقيا.
و بصح شمال افريقيا مختلف حضاريا و ثقافيا على افريقيا السوداء فبزاف ديال الحوايج، الماكلة، الشراب، الشطيح، المعيشة… ماكاينة تا شي نقطة مشتركة بين راجل كاميروني عندو خمسين عام و راجل مغربي عندو خمسين عام ! و حتى وسط افريقيا ! السينيغال ماشي هو الكاميرون و الكاميرون ماشي هو اريثريا و اريثريا ماشي هي جنوب افريقيا .. الاختلافات كاينة بين الدول الفرونكوفونية و الانكلوفونية و الاسبانوفونية و اللوزوفونية(ماشي لي كاياكلة اللوز آ بعرور لي كايدويو بالبرتغالية زعما) كاين فرق بين المسلمين و المسيحيين و اتباع الفودو ! كاين فرق بين لي كانت حاكماهم فرانسا و لي كانت حاكماهم النكليز و لي كانت شاداهم المانيا و اسبانيا… حيت افريقيا ماشي بلاد وحدة ! Entité وحدة ! افريقيا راها بزاف ديال الاجزاء و كل جزء بوحدو عندو عاداتو و تقاليدو و هضرتو و تاريخو.
و لكن بصفة عامة المغاربة ماكايشوفوش راسهم " افارقة" ، كايشوفو راسهم عرب ، شلوح، كور، كايidentifier راسهم للبارصا ، للريال، و لكن ماكايعتابروش راسهم افارقة و داك الخويط الوحيد لي كايشوفوه جامع بينهم و بين افريقيا هو كناوة.
المشكلة أنه اليوم بغض النظر عن واش حنا كانشوفو راسنا افارقة بصح و لا غي الخريطة لي شاركانا معاهم كاين واحد البعد اقتصادي مهم للعلاقات بين المغرب و افريقيا و لي المواطن البعروري العادي ماكايشوفوش، كايشوفو بنجلون مول البيمسي و الصفريوي مول الضحى و مولاي حفيظ مول ساهام اسورانص، و الشعبي مول يينا هولدينغ … البعد الاقتصادي لي كايشوفوه المراكنة و الشينوا و فرانسا ! داك البعد الاقتصادي لي خلا فرونسوا هولند يحرك الجيوش ديالو جوج مرات مرة فافريقيا الوسطى و مرة فمالي ماشي حبا في الكوحل و لكن حبا فالأرض لي كايتمشاو عليها عوازة و لي عامرة بالذهب و اليورانيوم لي كاتستغلو Areva الفرنسية فانتاج الطاقة النووية.
اليوم كاين بزاف مايدار فافريقيا مازالة vierge!بالنسبة لصحاب الفلوس، افريقيا سوق كبيرة و عامرة ببنادم لي مستعد يستهلك أي حاجة ديتيها ليه من المشاريع الكبار ديال البني و الطرقان حتى للكوكوطات و السيكان ديال الفين ريال كلشي كايتباع، و هنا فين المغرب مدخل راسو! كايسيفط البانكات، الشركات ديال البني، لاصورانصات… و داير تاهوا صبعو تما فحال بزاف د الدول لي كايتقاتلو على السوق الافريقية.
المشكلة هي هاد السياسة ديال الدولة حدها الرباط و كازا و البيرويات الكليماتيزي و قاعات الاجتماعات ديال دوك الشركات الكبار … بعرور مامسايرش! مافيراسوش! ماعلابالو لا بسوق لا بذهب لا بيورانيوم ! بعرور كايشوف فافريقيا و الافارقة غا ديك للنظرة الدونية ديال القحط و المجاعة و السيدا و ايبولا… بعرور كايعرف افريقيا غا من اخبار الحروب و الوثائقيات ديال ناشنال جيوغرافي لي كايبينو ليه دوك الافارقة لي كايشطحو عريانين فوق العافية طالين لوجهم الجير بيض، معلقين شي خراصي فودنيهم كولا خرصة قد الكصعة و كايغوتو حاطين يديهم على فمهم لالالالالا….
كاينة هوة كبيرة بين سياسة الدولة تجاه افريقيا و عقلية بعرور الراسيست لي ماكايبغيش يركب عوازة فالطاكسي حيت كايهضرو بالغوات و ماكايبغيش يكري ليهم حيت كايديرو الموسيقى بالجهد و كايعيط ليهم "سراق الزيت" فالزنقة و "بولفاف" فاش كايشوفهم لابسين البيض ! العقلية لي كاتخلي سعاي مغربي مقودة عليه يشوف راسو احسن من السفير ديال الكابون حيت السفير كحل و السعاي بيض.
مايمكنش تكون سياسة الدولة اتجاه افريقيا فجيه و سياسة بعرور اتجاه الافارقة فجيه ! حيت هادوك الافارقة لي غايعطيونا المارشيات غدا فداكار و ليبروفيل و كينشاسا هوما لي كايقراو عندنا اليوم فلافاك ديال السويسي و لونسيجي و لايسكاوو.. الافارقة لي غايصوتو علينا غدا فالاتحاد الافريقي هوما لي كايقراو عندنا اليوم فكليات العلوم السياسة فالقاضي عياض و بن زهر و لي كاندفلو عليهم فالزناقي و كانسبوهم فالطوبيسات. الجينيرالات لي غايديرو الانقلابات غدا و يشدو الحكم فافريقيا هوما لي عندنا فالمدارس العسكرية فمكناس و كازا و مراكش فحال محمد ولد عبد العزيز الموريتاني.
وا عنداك آ بعرور .. راه العود لي تحكرو يعميك…