وزير الصحة دار زيارة لمستشفى الغساني وقاليك الامور عادية. راه الامور كارثية ودير زيارة مفاجئة توقف على الصح

وزير الصحة أناس الدكالي اللّي دار زيارة البارح للمستشفى الإقليمي الغساني بفاس أعلن على صفحته الخاصة ب”الفايسبوك” أنه قام بزيارة تفقدية ليلية لمستشفى الغساني بفاس أمس الخميس.
وأعلنت صفحته الرسمية أن الوزير تفقد قسم المستعجلات وقسم الولادة، ووقف على ظروف عمل القسمين التي كانت تسير بوتيرة عادية.. بحال زعما كاع ديك الناس لي كيشكيو غير كذابة.
نرجعو لهاد الموضوع. بطبيعة الحال الوزير غادي يوقف على الامور كتمشي بشكل عادي حيتاش إدارة المستشفى وصلها لخبار ان الوزير جا لفاس وغادي يجي للمستشفى يدير زيارة مفاجئة وعارفين لخبار وصل لإدارة المستشفى عن طريق الناس ديال “البي بي إس”.
راه ا لوزير وكان باغي يدير زيارة خاصو يديرها مفاجئة وبشكل متخفي ماشي يعلم الناس ديال حزبو وبالتالي يمشي لخبار وينشر.. وكان مشا الوزير بشكل مفاجئ غادي يلقا لعجب فالمستشفى الغساني سيما ف الجهة ديال مستودع الأموات اللّي فيها روائح خايبة شكات منها الناس اكثر من مرة وقسم الولادة حتى هي.