شكون كذب علينا وگال باللي اتحاد لشكر غادي يدافع على المغرب خارجيا. شبيبة فاشلة وحزب مريض وزعيم ما فيه والو من هاد السمية وهمو الوحيد يهمش ناس الصحرا اللي فيديهم والنتيجة البوليساريو هلكاتنا بسبابو

نهار كان عبد الاله بنكيران باغي يشكل حكومتو بعد ما ربح بدراعو الانتخابات بل ربح ضد ارادة من كان يخطط باش البام يوصل للحكومة٬ خرجو شي وحدين وروجو باللي الاتحاد الاشتراكي ضروري للمغرب ضروري لسياستو الخارجية لديبلوماسيتو. لدرجة ان بنكيران ما دارش الحكومة وخرجوه وجابو لينا هاد خينا.
جات الضربة الاولى للبوليساريو فمؤتمر “بوزي” =شبيبات العالم الاشتراكية. خلات شبيبة الاتحاد الاشتراكي شبيبة البوليساريو تاخد العضوية وتحيح. هادي يومين فمونتينيگرو زادت شبيبة لشكر شوهات وزادت البوليساريو حيحات من خلال وصول ممثلتها لنيابة هاد التنظيم.
علاش الاتحاد اللي كان قبل محيح دوليا وداير الديبلوماسية الموازية بصاح وصل لهاد الحالة؟ حقاش صاحبنا ادريس لشكر همو الوحيد يطبق اش قالو ليه سيادو للي وصلوه للحزب، وعليه همش كاع الاصوات الاتحادية القافزة الفاهمة للملف. لشكر ضرب وجوه كتعرف الملف ديال الصحراء حقاش هي جزء منو بحال حسناء ابو زيد. شوفو غير هاد الحزب ما عندو حتى شي دور حتى حضور تقريبا فجهتي الداخلة والعيون فالبرلمان.
يعني اللي باعو لينا لشي دور فالسياسة الخارجية للاتحاد الاشتراكي غير كذوب ماشي غير كذوب بل انو فضيحة كبيرة حقاش شبيبة لشكر اللي سهلات على خصوم المغرب الطريق فاهم قضية عند لمغاربة.