بحال هاد الملاحم فيهم إسائة كبيرة للمغرب لأنهم خاصين بالدول المتخلفة وكيبين المغرب بحال الى منهم، وخصوصا بحكم ردائة المستوى ديال هاد الملاحم كنبانو بلاد ديال خاصها الحجر الصحي.

البلدان المتخلفة والمقودة عليها والديكتاتوريات لي لي فيها إستبداد بالحكم، كتلقى بزاف ديال هاد العنتريات المسماة ملاحم غنائية وطنية، وكتلقى فيها التباهي بالوطنية عبر الغناء والشعارات والهدرة زايد نغزة، ولي فالعديد من الأحيان كانت لبروبغندا نظامية من أجل السيطرة على الجماهير، ولكن في الحالة ديالنا حنا آه بلاد مقودة عليها كتعرف مشاكيل كثيرة ولكن حنا ماشي ديكتاتورية، يمكن ليك متغنيش على الوطن والراية مكاينش لي يقوليك شحال فالساعة، بالإظافة إلى أن الدولة عمرها جمعات الفنانين وقاتليهم غنديو على هادي أو هادي، هاد التكفيتات الفنية لي كنشوفو غير مجهود فردي ديال مواليها لا يشكرون عليه، مجهود كيبن بالواضح مدى الإنحطاط والهزالة والتذلل والمسكنة وانعدام الحس الإبداعي لي كيتميز بيه الفنان المغربي تقريبا بصفة عامة وخصوصا ملي كيعبر على حبه للوطن بلا مايحاشيهاليه شي حد.
الإبداع الفني المرتابط بالديكتاتورية أو بالبروبغندا أو بلحيس الكابة ماشي بالضرورة كيكون عيان وبدون مستوى، يكفي أنك تتفرج فيلم المدمرة بوتمكين باش تقدر تحس بعظمة البروبغندا على أصولها وتقدر تولي بلشفي مباشرة من بعد الفيلم، كما أنه يكفي تسمع لإميليا رودريغيز وهي كتغني فن الفادو حتى يولي يبان ليك سالازار فنان عبقري وماشي ديكتاتوري، والعديد من الإبداعات الفنية الأخرى لي كان الهدف منها التملق للدولة بحال النص فديوان المتنبي، ولي بقات ابداعات فنية خالدة بغض النظر على الهدف منها.
غير هو كتجي حتى لعندنا حنا وكتلقانا خارية علينا، شعب مايعرف يكون وطني بصح مايعرف يتملق بما يليق، وهاد الفيروس عاداونا بيه المشارقة لي غير حتى لهنا وهنا كانو باقين عايشين قبائل كل واحد كيفتاخر بقبيلتو ويقول فيها داكشي لي مكاينش، وملي ولاو دول وإمارات بقاو شادين نفس الريتم وطبعا بمستوى بهلواني، حنا كمغاربة آش جابنا لهادشي وىش جابنا لشي ملاحم، باركة غير الإبتلاء ديال العنزي وتخربيقه نزيدو حتى هاد التقالة والزهامة لي بانت فهاديك 13 دقيقة لي سميتها ملحمة ، ملحمة آش ؟ الغباء المقدس، راه حشومة وعيب وعار وأننا عايشين فدولة فيها هامش الحرية موسع نوضوا نديرو مكيديرو الناس لي عايشين فالديكتاتوريات، بحال هاد الملاحم فيهم إسائة كبيرة للمغرب لأنهم خاصين بالدول المتخلفة وكيبين المغرب بحال الى منهم، وخصوصا بحكم ردائة المستوى ديال هاد الملاحم كنبانو بلاد ديال خاصها الحجر الصحي.