فضيحة كبيرة ف”لارام”. بيلوط ساگ طيارة فبلاصة مراتو البيلوط وهي دات رحلة اخرى ومديرها عدو طردهم بلا قانون وبغى يلوي دراع جمعية الربابنة

علمت “كود” ان فضيحة مدوية عاشتها “الخطوط الملكية المغربية”. وفق مصدر “كود” فان الامر يتعلق بكون احد ربابنة الشركة تكلف برحلة مراتو اللي حتى هي بيلوط وهي دارت رحلة فبلاصتو. لفضيحة ماشي تبادلو الرحلات بلا خبار حد فالادارة بل قرار المدير العام عدو. اذ قرر وفق مصدر “كود” طرد لبيلوط المتزوجين. “ما دارش المسطرة المتبعة فهاد الامور. ما دارش مجلس اداري ما دار والو. طرد وصافي”.
مصدر “كود” اكد ان هاد التصرف كان يهدف من خلاله المدير العام ل”لارام” الى لي ذراع جمعية الربابنة “بغى يخليهم يجيو يطلبوه باش يرجعهم ويحسسهم باللي دار فيهم شي فاڤور باش يقلصو احتجاجاتهم ضدو” يشرح مصدر “كود”. هذا ما يفسر ان جمعية الربابنة ما حاشاتهاش ليه.
دابا التسيب وصافي فهاد الشركة. شي يخدم فبلاصة شي وهاديك المرة بيلوط داز لمطار اخر وهاز الناس باش ياخد صحابو. المدير شخصية ضعيفة ما فيدوش. الشركة كتغرق وكلشي طالع ليه الدم.