انفراد. فضيحة ملف ترشيح المغرب ل”مونديال 2026″ طلعات التيرانات. ماشي كلهم صالحين وخاصهم يتقادو وها كيفاش تنقد الموقف وشكون الوزارة اللي خدمات و”سونارجيس” مع وزارة الشبيبة والرياضة ما تسوقوش

خلال الاعلان الصحافي ديال الجمعة اللي فاتت واللي قدم فيه مولاي حفيظ العلمي رئيس لجنة ملف ترشيح المغرب لمونديال 2026 بالدار البيضاء قال ان لجنة الفيفا =اللي سالات زيارتها الخميس اللي فات= دارت ملاحظات على ملاعبنا. هاد الملاعب ما فيهمش كاع المعايير اللي كيحددها الفيفا وتخص المشاهدة والسلامة والرياح……
الفيفا كانت طلبات يكونو 6 الملاعب جاهزة كتهز 40 الف متفرج. من بعد نزل العدد. فالاول كانو كيقولو لينا باللي عندنا 6 ولكن من بعد تقدمو 4 وصافي. وفق مصادر “كود” فان هاد الملاعب ناقصها اولا الطاقة الاستيعابية اي ما فيهاش 40 الف حقاش كاينين شي بلايص ما يمكنش يتفرج فيها فالمونديال وفق معايير الفيفا ودابا الحل للي تقدم هو تجرى تعديلات على مراكش ويتزاد فالطاقة الاستيعابية فطنجة
مصدر “كود” قال ان ملعب اكادير تاثرت فيه مسائل تتعلق بسلامة المتفرجين وخاصو تعديلات حتى هو ويتقاد حتى يولي خاضع لدفتر تحملات الفيفا.
لفضيحة لكبيرة هو انو عندنا واحد الشركة اسمها الشركة الوطنية لانجاز وتدبير الملاعب “سونارجيس” اللي خدمتها تدبير الملاعب وكان انشأها منصف بلخياط باش كان وزير للشبيبة والرياضة. هادي تابعة للوزارة. اش دارت هاد الشركة وفين كانت وكيفاش ما خبراتش اللجنة اللي كيرأسها العلمي ولا حتى الجامعة الملكية لكرة القدم. هاد الشركة اللي خداها واخا مهندس ما كيفهمش فالتيرانات وهو مع وزير الشبيبة والرياضة الطالبي العلمي مسؤلين على هاد القضية ديال الملاعب.
تقولو سونارجيس ما عندهاش الامكانيات هادي هدرة اخرى ولكن هادا ملف ديال تنظيم كأس العالم وكان خاصو الصرامة وكلشي يخدم فيه. بل حتى لجنتنا ديال المونديال باش تشكلات كان خاصها خبير فهاد الشي. خدمتو يوجد كلشي يعرف المعايير ديال الفيفا يخدم يقلب على كاع التفاصيل.
سونارجيس دارت فضيحة اخرى٬ فوفق مصادر محلية من اكادير فانه شوهد تواجد رجالات السلطة اي وزارة الداخلية في الملعب الكبير للمدينة. مصدر “كود” قال باللي هو اللي نقاوه وقادوه وصايبو كلشي فيه. هاد الشي دار فاكادير اكيد دار فملاعب اخرى قبل زيارة الفيفا. اش كيعني؟ باللي هاد سونارجيس خاصها طيح الريدو وصافي. ما دارتش خدمتها وصدقات مصالح وزارة الداخلية كيدير خدمة الشبيبة والرياضة.
تنظيم المونديال فرش امور كثيرة اكيد باللي كاينة معطيات مازال ما خرجاتش غادية تفضح هاد القطاع اكثر