إطلاق الدفعة الاولى من معتقلي حراك الريف نقطة ضوء فهاد الظلمة اللي كنعيشوها. خاص يتبعها اطلاق باقي المعتقلين والافراج على الصحافيين المهداوي وبوعشرين باش تسدو هاد الكابوس

زوينة بزاف ان عيد الاضحى عرف اطلاق سراح 184 معتقل من معتقلي حراك الريف. زوينة ان هاد الملف اللي ثمنو كان وغادي يستمر باهض للمغرب ولاستقرارو يبدا يعرف طريقو للحل. زوينة ان اشارة ضوء وسط عتمة عشناها ونعيشها منذ الانقلاب على عبد الاله بنكيران رئيس الحكومة اللي جابها بدراعو وجابو لينا هاد بنعرفة.
مع هاد بنعرفة ولى مغرب اخر. كلشي كيشكك فيه. الثقة رجعات والفعالية نقصات. الحماسة ديال بعد دستور 2011 فترات. دخلنا مرحلة شك طويلة. كلشي فيها غريب. جات حملة المقاطعة لتصفي بعض الاطراف فالدولة حساباتها مع اطراف اخرى على حساب الاقتصاد المغربي.
لا الخطابات بقات عندها نفس الفعالية ونفس الوقع ولا القرارات ولات عندها قيمة. اقالة بوسعيد وزير المالية والاقتصاد او اطلاق سجناء حوكموا بالارهاب ما غيراتش بزاف. كان كلشي كيسنى خطاب ملكي على الريف على اللي وقع على اللي خاصو يدار. ما جاش الخطاب. دابا جا بدية ديال العفو على معتقلي حراك الريف.
الريف جريح. جرحوه بعض اولادو اللي باعو الوهم للقصر امثال الياس العماري رئيس الجهة. كان رجلهم فالمنطقة. كان اللي كيدعي كيملك سوارت الريف. يسكت هادا وينوض هادا. هاد الشي بان باللي الدولة باعتمادها على الاصالة والمعاصرة خلصات الثمن غالي. الديموقراطية ولو ديال الواجهة ما خاصهاش تتقاس.
الاعلان عن بدء تمتيع معتقلي حراك الريف بالعفو خطوة على الطريق الصحيح. راها غير بدية. خاص امور كثيرة تتغير فالدولة. المواجهة مع هاد الناس ما عمرها عطات نتيجة لا فالسابق ولا اليوم. اللي خاص هو المحاسبة الحقيقية اللي تسبب فاللي وقع لمنارة المتوسط. ماشي الوزراء اللي حيدوهم اللي مسؤولين اللا. كاين اكثر منهم اللي كذب على الدولة ومازال.
لبلاد خاصها ترجع ثيق فراسها وناسها يثيقو فيها. هاد الشي غادي يكون باطلاق سراح باقي معتقلي حراك الريف وفي مقدمتهم ناصر الزفزافي. خاص اطلاق سراح الصحافي حميد المهداوي حقاش اعتقالو بهاديك التهمة البليدة اهانة للمغاربة وشوهة للبلاد.
ثم خاص طي ملف توفيق بوعشرين مدير نشر “اخبار اليوم”. يوم بعد يوم يتأكد ان هاد الملف كلو ثقابي. تشويه هاد الصحافي كنظن كافي. محاكمتو بهاد الشي اللي وقع ما شاداش بزاف. طويو هاد الملف باقل الاضرار.