راه هاد الشي خايب للبلاد ولصورة رئيس لبلاد. مول صفحة محمد السادس هاداك البحري كبر ليه الشان وولى كيعطي جائزة لسيدو ملك الشعبي الستاتي ومسؤولين كيلحسو ليه الكابة

“بغينا شي واحد يكول لينا شكون هاذ سفيان البحري اللي تجاوز حجمو والا لكان ضروري تروجو لصورة الملك … فهذا راه الأسلوب خطأ” …هكا علقو متتبعين ل” كود” على هاد الخرجات الغريبة و الخطيرة ف هاد الصيف لهاد الشاب اللي مادار اي حاجة عندها قيمة مضافة من غير تسيير صفحة في الفايسبوك عامرة بصور غير رسمية وشخصية لرئيس الدولة.
و بالفعل بزاف ديال الناس و النشطاء الجمعويين المحليين اللي حضروا مهرجان شبابيات اللي احتضانتو مدينة سلا مساء الثلاثاء تساءلوا شكون هو سفيان البحري اللي عطا لعبد العزيز الستاتي نجم الأغنية الشعبية تذكار التكريم.
شفتو الوقاحة. الستاتي بقيمتو لكبيرة جابو ليه نكرة يقدم ليه تكريم. بحال الستاتي خاصو أصلا يرفض ياخد من نكرات بحالو تسلم جوائز.
أكثر من ذلك حضور المدعو سفيان البحري لفعاليات الأمسية الفنية، حوله إلى نجم السهرة. اييه نجم. فقد قال حاضرون ل"كود " انهم لاحظوا تودد مسؤولين فاجهزة كثيرة فالدولة لسفيان البحري. مسؤول كبير قرب في أكثر من مناسبة من سفيان البحري ووشوش فوذنو. شفتو فين وصلات بلادنا.
هاذ الشي اللي وقع فسلا وفبلايص أخرى دعي لها سفيان البحري كضيف شرف وقدم بصفة مدير صفحة محبي الملك محمد السادس، كيأكد أن البحري اللي معندو تا وضع و حتا شي منصب رسمي، أو على الأقل اعتراف بإشرافه على نشاط معين، يستفيد من وضع اعتباري لا سند له، لدرجة أن جماعة بضواحي عمالة تمارة نظمت حفلا فنيا حضره سفيان البحري تحت حراسة رجال الدرك الذين رافقوا سيارته حتى غادرت تراب الجماعة. واييه. ياك قلت ليكم را حنا فبلاد العجائب.
هاذ الشي حسب مصادر ، دفع سفيان البحري ليفاخر بعلاقته مع كبار الشخصيات لا سيما بعض الأجهزة الحساسة، و لا يتوقف عن استعراض نفوذو فجلسات حميمية فالأندية المغلقة. شي وحدين ضارباهم الحلوفة ومعولين عليه يرقيهم كاع.
داك الشي اللي مكيقولوش سفيان بشكل رسمي بات على كل لسان بعدد من الأوساط السلاوية حيث نشأ وترعرع سفيان البحري و أصبح بقدرة قادر المروج الأول لصور الملك غير الرسمية، والمروج في ذات الآن لبعض الروايات التي تشبه الأساطير.
هاذ الشي خاصوا يكون رسالة لشي ناس اللي طالقين الحبل على الغارب. راه التواصل وترويج صورة الملك ميمكنش مسألة مزاجية ديال شاب داير مشروع حياتو كلو على دغدغة مشاعر المغاربة و احتكار صور شخصية للملك و اللي يقرا التعليقات ف الصفحة المذكورة يبقا فيه الحال حيث الاف المواطنين المغاربة المساكن يعتقدون انها صفحة رسمية ناطقة باسم الملك و كايمعمروها بطلبات و شكايات كتقطع القلب و ربما استغلها النصابون. راه شحال من مرة وقعات مشاكل بسباب ديك الصور اللي شي مرات كتعدل بالفطوشوب و تسيء لرئيس الدولة .
وهادشي من نتائجه المباشرة ان الفايسبوك ولا عامر بمئات صفحات بغات تقلد البحري وتاهي كتدير صور الملك و بزاف من الاميرات و الامراء وربما تعرف عمليات انتحال صفة ونصب ..ماننساوش انه ف سنوات بداية انتشار الفايسبوك ف المغرب تمت محاكمة مهندس اعلاميات لانه دار صفحة باسم الأمير مولاي رشيد.
مختصون فالتواصل الرقمي اللي ولى علم كايتقرا و يدرس٬ صرحو ل”كود” “حنا في زمن فيه صور الملوك والرؤساء ونجوم والرياضة والادب والفكر لا تحتمل هذه العشوائية في التدبير بل كتختار بعناية و مواقع التواصل الاجتماعي سهلات العملية و ولات عامرة بصفحات رسمية معترف بها دات علامة زرقاء تسيرها رسميا مصالح التواصل اللي ف القصور و الحكومات كما ف ملكيات اوروبا و غيرها”.