قرار حكومي غادي يزيد يشعل الوضع:حرمان عدد كبير من الطلبة من المنحة

هاد السنة الجامعية بزاف ديال الناس تصدمو مالقاوش سمياتهم فلوائح المقبولين بالنسبة لمنحة التعليم العالي، وبالرغم من ان هاد الناس ضروفهم المعيشية صعيبة ومدخولهم السنوي ناقص بزاف، ومن بعد ماكتصدم الانسان بعدم وجود اسمه فاللاوائح الموجودة فمقر عمالات الممكلة، يتم ارسالك لتقديم شكاية او الاستفسار في مكتب المنح الموجود بمقر العمالة نفسه، الغريب فالامر وهو من بعد ماكتدخل لمكتب المكلف بالمنح الجامعية ولي هو مكتب مكيف ونقي، وكتسولو على سبب حرمان ابنتك ولا ابنك من المنحة كيوجهك لتقديم شكاية، ومن بعد ماكتسولو على المعايير لي اعتمداتها الوزارة هاد السنة كشرط للاستفادة من المنحة، كجاوبك والابتسامة ظاهرة على محيى وجهه، بلي معيار وحيد وهو الوزارة قالت ليهم لي كيفوت فالمجموع ديال الدخل السنوي للاب والام معا، اييه بجوجهم ، لي كيفوت 12 الف درهم مامنحقوش المنحة، غادي تسمع المبلغ وغادي تعاود تسول شحال غادي يجاوبك 12 الف درهم سنويا….
12 الف درهم سنويا الى قسمتيها على 12 شهر، غادي تجيك 1000 درهم لشهر، اييه 1000 درهم لشهر، وزارة التعليم العالي هاد السنة اعتبرات اي واحد كيشد كتر من 1000 درهم شهريا فهو ميسور وغني لا يتسحق المنحة، وزارة التعليم العالي طبقات نظرية زميلتهم فوزارة الاسرة والتضامن والمساواة والتنمية الاجتماعية، ولي فايت للوزيرة بسيمة الحقاوي صرحات ان اي واحد كيتخلص 20 درهم يوميا فهو خارج دائرة الفقر ولباس عليه…
1000 درهم كمدخول شهري لي اعتمداتها الوزارة هاد العام كمعيار وحيد للاستفادة من المنح ماعرفاش هاد الوزاة ان الناس كارية وكتخلص الما والضو وعندها ابناء اخرين وان 1000 درهم ماتكفاكش حتى لثمن الكراء فمدينة صغيرة ؟ واش سبق لوزير التعليم العالي جرب اعيش غير بالمانضة ديال 4000 درهم شهريا وخلص منها الكرا والما والضو وصرف بيها على الابناء ديالو فالجامعة؟
كان من الاولى يحيدو تقاعد البرلمانيين ونقصو ليهم فالمانضة هوما والوزراء باش اجربو يعيشو كما كتعيش اغلبية المغاربة وصرفوها على منح لطلبة، لانه من العار فنفس الوقت لي وزير فدولة مشغول مع خطيبتو فباريس كتلقا طالب حالتو مكرفصة يلاه طلع للجامعة باغي يقرا باش اوصل حتى هو، فبلاصت مايقابل قرايتو طالع للعمالة كيجرو فيه على منحة ماوصلاش لجوج فرنك فالعام…
هاد الناس لي كيتخدو هاد القرارات العشوائية والغير مدروسة وفهاد الظرفية لي كاينة حالة من السخط وسط الشارع المغربي واش عارفين اشنو كيديرو ولاش باغين اوصلو من هادشي؟