حل جمعية “راسين” بسباب “ملحمة العدميين”. رئيسها ل”كود”: شعار اليوم دابا اللي دوا يرعف وهاد الشي كيهم حرية التعبير فالبلاد وفالنهاية بغاو يقتلوها

ضربة اخرى للحريات فالمغرب. القضاء حل جمعية “راسين” بسباب “ملحمة العدميين” اللي دارها “عشا واحد وجوج اغبياء” هادي مدة. لعشا كان استاضف رئيس الجمعية عادل السعداني واحمد بنشمسي والمغني باري والصحافي عمر الراضي واخرين وهدرو على خطاب الملك وعلى الملحمة وعلى لالة سلمى….
بعد الملحمة راسل عامل انفا فكازا =لان التصوير كان فجمعية راسين اللي مقرها فانفا= النيابة العامة. الداخلية طالبات بحل هاد الجمعية وبررات داك الشي باللي الجمعية بهاد التصوير خالفات نظامها الداخلي.
كانت اول جلسة نهار 12 دجنبر. محامي الجمعية طلب تأجيل باش يوجد مقالو يرد فيه من حيث الشكل على القضية. الجلسة الثانية كانت نهار 19 دجنبر. مصدر من الجمعية قال ل”كود” بان هاداك المقال اللي قدمو دفاعهم ما رداتش عليه كاع النيابة العامة ليتم الحكم نهار 26 بحل الجمعية. هادا حكم ابتدائي.
عادل السعداني رئيس الجمعية اكد ل”كود” انه مازال ما بغاش يدير رد علي هاد الحكم حتى يتوصل بحيثات الحكم واضاف ان الجمعية بانت بعقلها وبعدات على التعليق لحد الان.
وبخصوص موقفه من هاد القرار اكتفى بالقول ل”كود” “ان الشكاية اصلا فيها مشكل. لانها كتكلم على ان الجمعية ما احتارماتش قانونها الداخلي. للي وقع هو ان الجمعية تحاكمات على اراءها السياسية ماشي على حاجة اخرى”. واكد ل”كود” “الانشطة ما عندها علاقة بالاراء السياسية. فالنهاية بغاو يقتلوها وصافي”
السعداني نبه ان الامر ما فيهش “راسين” بل كيهم حرية التعبير فالمغرب وانو دابا كاين شعار “واللي دوا يرفع” وباللي ليطا ديسبري العامة فيها هاد الشي