حرب بين لقجع والطالبي العلمي على تهجير اللاعبين الصغار. شكون يبان فالملف؟. الجامعة: جمدنا انشطة كاع الوسطاء وغاديين ندعيو هادو

البارح انعاقد المكتب المديري للجامعة الملكية لكرة القدم وحضروه كاع رؤساء اندية القسم الاول فبطولة اتصالات المغرب. ولكن المهم ما كانش غير البرمجة.
قبل هاد الاجتماع بساعات خرجات وزارة الشبيبة والرياضة وقالت انها غادية تحارب الاتجار بالابطال المغاربة وباللي غادية الجامعات تعلق انشطة الوسطاء اللي متهم فيهم شي وحدين بتهجير اللاعبين. هاد الشي ربطاتو وزارة رشيد الطالبي العلمي بما قدمه الوزير في مجلس الحكومي قبل اسبوعين حول الاستراتيجيتين الوطنيتين للشبيبة والرياضة. غير تم التركيز على اللي غادي يطرق ليه المكتب المديري. غير الوزارة سبقات انعقاد اجتماع الجامعة.
باش تعرفو اكثر اش قرر اجتماع المكتب المديري للجامعة البارح فهاد الموضوع:
هدر على « ملف تهجير اللاعبين القاصرين » الى الخارج وقدم نائب الرئيس حمزة حجوي معطيات دقيقة لم يفصح عنها بيان الجامعة واشار البيان انه « تم تجميد جميع الوسطاء المسجلين لدى الجامعة الملكية المغربية لكرة القدم الى حين تسوية وضعيتهم الادارية والقانونية » و »اعادة النظر في الرخص الممنوحة للوسطاء » ثم وهذا هو الاهم متابعة اللي حرك اللعابة من خلال « تكليف محامي لوضع شكاية باسم الجامعة » فهاد الموضوع.
هاد الشي كولو هو اللي نشراتو الوزارة قبل من انعقاد المكتب المديري او لنقل قبل ما تنشر الجامعة بيانها. لانو الاجتماع دار مع الربعة العشية البارح وخلاو البلاغ حتى الليل لحقاش كان ماتش الوداد والترجي
هاد الشي غير استمرار لحرب بين الطالبي ولقجع كانت بدات فملف تنظيم المغرب لمونديال 2026 وعرفات حدتها باش سحبات الكاف من الكاميرون تنظيم كأس افريقيا للامم اللي كانت غادية تجي للمغرب وهي تمشي لمصر