حسون والي أمن القنيطرة جبد النحل على راسو.. دار الويكلو على ماتش الجيش بلاسباب.. الجمهور غادي يحتج قدام البرلمان وكيهدد بالتصعيد

عبد الله حسون، والي أمن القنيطرة، جبد النحل على راسو، بعدما منع جمهور الجيش الملكي من التنقل إلى القنيطرة لتشجيع فريقه أمام أولمبيك أسفي نهار الأحد برسم المباراة المؤجلة عن الدورة الثانية من منافسات البطولة.
والي الأمن تحدى كلشي وفرض الويكلو على الفريق العسكري، بعدما استغل أن الجنرال محمد حرمو، الرئيس الفعلي الجيش الملكي ما كيبغيش يدخل فهاد التفاصيل، لي متعلقة بالكرة واخا الفرقة ديالو كتكون متضررة.
دابا المشكل غادي يكبر، لأن القرار ما تبناش على قانون واضح، لي خلا المسؤول الأول عن الأمن فالقنيطرة ينفرد بيه بوحدو ودون استشارة فؤاد المحمدي، عامل إقليم القنيطرة، الذي يفضل العمل بقاعدة كم حاجة قضيناها بتركها.
علاش هاد القسوة مع الجمهور ديال الجيش الملكي وعلى أي أساس اتخاذ قرار منع الجمهور، لي من حقو التجول وتشجيع فريقه، خصوصا انه مادارش حتا صداع نهار ماتش الجديدة، الأربعاء لي فات. ولي تسبب في الشغب والعنف والفوضى، هو جمهور الدفاع الحسني الجديدي، بعدما ضابو جوج ديال الفصائل.
وعلى هاد الأساس حتا أمن الجديدة خاصو يدير الويكلو على ماتش الوداد البيضاوي والدفاع الحسني الجديدي نهار الأحد.
المشكل ما غاديش يوقف عند هاد الحد، بعدما دخلات جمعيات الجيش الملكي والإلترات ديالو على الخط، وقرروا يحتجوا أمام قبة البرلمان نهار الأحد، احتجاجا على قرار والي أمن القنيطرة، وأكثر من هادشي كامل قرر الجمهور يمشي القنيطرة صحة، الشيء لي يقدر يتسبب فاحداث شغب لم تكن في حسبان الوالي عبد الله حسون. الله يلطف والسلام، ونتمناه ما تكونش ردة فعل الجمهور العسكري سلبية ويحكم عقلو وضميرو باش ما يضرش فريقتو اولا ويتسبب فأحداث شغب تقدر يمشيو فيها أبرياء.