التراب باطرون الفوسفاط: اجيو عندي شكروني وقولو لي انا مضوي لبلاد واللي عندو عائلتو يجي يخدم واخرها صحافي فشل فمشاريع وجابو نسيبو لهاد المكتب

مصطفى التراب باطرون المكتب المديري للفوسفاط عزيز عليه الصباغة. دار مؤتمر من طرف مؤسسة كان تابعة ليه ودابا خدا مسافة و لكن باقي هو اللي كيمولها٫ فمراكش. هاد المؤتمر هو اللي جاب ليه رئيس رواندا بول كاگامي وفيه كانت الندوة اللي بسبابها استاقل صلاح الدين مزوار رئيس الباطرونا بعد ما جبد الجزائر وجبدات ليه الخارجية ودنيه وعايراتو.
قبل المؤتمر بدات الصباغة فمصطفى التراب اللي اصلا ما محتاجش للصباغة ولكن معاه شي اغبياء لحاسة الكابة كيدورو على الصحافيين باش يكتبو عليه كتبة تحشم تكولها. قالو ليك يا سيدي هاد التراب هو كلشي فالبلاد هو اللي كيفهم الملك محمد السادس وعندو مشروع تنموي شامل مندمج. هادو صحاب الفوسفاط كيخرجو على الصحافة وعلى التراب.
هاد القضية ديال انا بوحدي مضوي لبلاد ما محتاجهاش واحد ذكي بحالو ولكن كيطيح فهاد الغباء هو وفريقو.
طبعا باش تشوف شكون كيخدم فهاد الفوسفاط من ولاد العائلات كبيان ليك العربون. كاينين اللي كيضربو تمارة ومقاتلين وداخلين بالاستحقاق وكاين اللي داخل بالصحبة. مثلا هاداك سليمان بنالشيخ. سير “زمان” وجروا عليه. مشى عند الياس العماري عبر نسيبو عبد السلام ابو درار ودار ليه مجلة فالتاريخ وفشلات وحصل وفين مشى؟ عند الفوسفاط خدام فاعداد احتفالات مائوية الفوسفاط.
هادي قصة اخرى وامور كثيرة غادي يجي وقتها.
دابا للي فشل فشي منصب ديوه للفوسفاط وخزنوه. گاليك المشروع التنموي النموذجي هو الفوسفاط. لاواه النبگ