خاص. گاليك باغي يطلع النيفو. مزوار مرشح الباطرونا ما تايقش فالقطاع الخاص ومخدم بنتو فالفوسفاط

سارة مزوار اللي تشهرات فرسائل كولمان خاصة تلك اللي فيها رسالة من باها صلاح الدين مزوار وكان ايامها وزير للخارجية والتعاون٬ الى نظيره الفرنسي حينها لوران فابيوس كيوصيه ويطلبو على بنتو سارة هادي. مزوار ما عمرو كذب هاد الشي ما عمرو هدر عليه. ضرب الطم
هاد سارة علمت “كود” انها ولات خدامة مستشارة وعند من عند مصطفى التراب الرئيس المدير العام للمجمع الشريف للفوسفاط.
هاد الشي فشي شكل. اللي كيجمع بيناتهم هو مدينة مكناس. ولكن واخا هاد البنت تكون طيارة كيفاش وصلات لهاد المنصب فشركة ديال الدولة. كنعرفو خروب بلادنا. على كل حال الفوسفاط من نهار جاه التراب وخدمو مزيان كاع مرفحين لبلاد لاحو ولادهم وبناتهم. اولاد الشعب خاصهم يكونو طيارات بزاف بزاف بزاف باش يدخلو لمناصب مزيانة.
الفضيحة فهاد الشي هو ان مرشح الباطرونا صلاح الدين مزوار ما تايقش حتى فالقطاع الخاص اللي باغي يولي باطرون فيه واخا ما عمرو فحياتو دار شي استثمار. باش ما عندوش فيه الثقة لا هو لا بنتو علاش باغي يولي رئيس الباطرونا.
هاد السيد جامع عليه واحد الغبي فالتواصل كان تابع لالياس فالبام حتى ما خدا والو وهو يمشي كيحسن ليه صورتو. صورة خايبة بزاف بزاف. هادي يومين دار تصريح كيضحك وبزاف. خاطب منافسه المراكشي وقال ليه “هز النيفو” فالنقاش. وراه كون كان النيفو كون ما قلبوش ليه على شركة باش يولي عندو الحق يترشح ودابا كيفهم. باغي ينقل تجربتو. فاش باش حيدو ليه سمطة السروال والصباط فمطار اورلي ولا باش كيعيط ليك الياس العماري كتجري عندو وانت راجل بقدك بقامتك وتحدر لواحد قصر منك