فضيحة…أرشيف الوداد والرجا استغلاتو قناة ابو ظبي أبشع استغلال…واش تباع أو تعطا فابور…مدير “الرياضية” نايض عليه النحل وها شكون مرشح ياخد بلاصتو

واش ما شي من حق المغاربة يشوفو أرشيف الوداد والرجاء على قناة “الرياضية”، اللي كايمولوها من جيوبهم، قبل الديربي، الذي سيجمع الغريمين التقليديين السبت الجاي بملعب مركب محمد الخامس في الدار البيضاء برسم ثمن نهائي كأس محمد السادس للأندية العربية.
“الرياضية” بدل أن تستغل ارشيف الديربي منين بدا حتا لدابا، وتنقلوا بالصوت والصورة للمشاهدين ديالها وتلمع صورتها بين تلفزيونات الوطن العربي، فضلات توضعو رهن إشارة قناة فضائية منافسة، لي هي ابو ظبي الإماراتية واستغلاتو ابشع استغلال.
كان عند هاد قناة “الرياضية” فرصة تاريخية باش تنفارد بارشيف الديربي، اللي هو اصلا موروث ثقافي ورياضي ديال المغاربة، لكنها أثبتت مرة أخرى أنها بعيدة كل البعد عن الغيرة على إرثها والمهنية والحرفة ديال بصح.
هادشي كيجرنا لطرح أسئلة مهمة، واش هاد الأرشيف تباع ولا تعطا فابور للقناة الإماراتية أو كانت شي حاجة تحت الطبلة والله أعلم؟ وشكون ورا هاد الصفقة؟ واش فيصل العرايشي رئيس الشركة الوطنية للإذاعة والتلفزة عندو الخبار ديال هاد الموروث، لي تهرب لقناة عربية حققات فيه قصب السبق؟.
خاص تكون أجوبة تشفي غليل المشاهد المغربي، لي تابع تصريح رئيس قناة أبو ظبي، يعقوب السعدي، كيشكر فيه حسن بوطبسيل، مدير القناة “الرياضية” على تعاونه المثمر والفعال مباشرة، بعد بث ارشيف الوداد والرجاء، لانه عارف قيمة الكنز، اللي حصل عليه مجانا او بمقابل مالي.
هاد الفضيحة نوضات النحل على مدير الرياضية، لحقاش ما عندوش الحق يتصرف ف ارشيف الديربي، هو موروث ديال المغاربة كاملين، وحتا إلا تباع خاص يكون بمقابل مالي يوازي القيمة ديالو ويتعلن على مبلغ الصفقة ما شي دوز حسي مسي.
ربما أن القضية غادي تكون عندها تبعات، خصوصا بعد تسريب أسماء، لي يمكن ليها تعوض مدير الرياضية الحالي بحال محمد عمور مدير البرامج ببين سبورت القطرية وصلاح الدين العماري رئيس القسم الرياضي بالقناة الثانية. العرايشي اش كاتگول ف هاد الفضيحة راك انت اللي مسؤول الأول، وانت لي من المفترض تحاسب وتتحاسب أسي.