دوزيم" تدافع عن العنف ضد النساء: كون هاد الشي دارتو "التجديد" و"العدالة والتنمية" كون خلقو مسيرة ضدهم كاع. "دوزيم" تتصالح مع العنف ضد لعيالات وها نصحيتها ليهم

اليوم غادين نهدرو على موضوع حزين ولكن مع اليوم العالمي لمناهضة العنف ضد المرأة غادين نوريكم تقنيات الماكياج اللي يمكن ليكم تستعملوه باش تخبيو اثار العنف على وجوهكم" هادي ماشي نصائح ديال شي متخلف من التيار المحافظ هادي نصيحة قدمتها وحدة اسمها ليليا مولين مضبرين عليها كي غيرها ف"صباحيات دوزيم" ورجعوها منشطة. البرنامج داز اليوم 25 نونبر. السيدة زادت قالت "هاد الموضوع ما يمكنش لينا نتكلمو عليه ولكن للاسف هاد الشي اللي كاين. طبعا جابت عارضة كتبان مضروبة فوجهها وبدات كدير فالماكياج.
تصورو ان شي جهة تابعة للعدالة والتنمية او لجهة اخرى محافظة دارت هاد الفضيحة هاد التطبيع البئيس مع العنف ضد المرأة بهاد الاسلوب الحقير اش كان غادي يكون. ياك سميرة سيطايل نائبة مدير "دوزيم" خرجات كاسرونة على كلمة "ثريا" للي كالها بنكيران رئيس الحكومة وشاركات فوقفة امام البرلمان وعندها الحق حقاش مسها بهاداك الوصف اللي ماشي مزيان٬ ودابا اش خاص يدار. راه كلام هاد السيدة فهاد القناة "الحداثية" خاصو مسيرة ماشي وقفة. مسيرة ماشي ديال ولد زروال ولكن ديال كاع النساء اللي شعرو بالاهانة والحكرة.
هاداك الاعتذار اللي دارتو القناة على صفحتها على الفايسبوك كيبين قمة احتقارها للقناة. انتوما هنتو لعيالات وماشيين للفايس تعتادرو. اعتبروه خطأ "لا يتماشى بأي شكل من الأشكال مع الخط التحريري للقناة، متوعدة بمعاقبة كل من تورط في هذا "الخطأ". غير تعمار الشوارج. اللي دار الخطأ هو التسير اللي كاين فالقناة، مديرة الاخبار نائبة المدير العام خلات خدمتها كلها ومشات ل"كوب 22" واستغلات قناة هي مسؤولة عليها باش تزوق هاد الحدث راه فضيحة اخرى هادي.