الروابة مالين أغنية “عاش الشعب” كيأكدو أنهم مبحوث عليهم والأمن: ماكين لا مذكرة لا والو

هادي سيمانة كل نهار كيخرج فيديو ديال الروابة لي غناو أغنية “عاش الشعب” المثيرة للجدل، وكيطلبو من المغاربة يتضامنو معاهم وكيأكدو أن البوليس كيقلب عليهم.
أول فيديو خرجو فيه هوما بثلاثة، اي الكناوي وولد الگرية الزعر وبعدها فيديو ديال الكناوي، والبارح فيديو ديال الزعر، والميساج واحد أن البوليس كيقلب عليهم، لكن مصدر أمني أكد ل “كود” في أكثر من مناسبة أنه ماكين لا مذكرة بحث لا والو، وأن الرابور الكناوي تشد من أجل ضوسي بعيد على الأغنية وكان فعلا مبحوث عليه.
ورفضات هيئة الحكم بالمحكمة الابتدائية لمدينة سلا البارح الاثنين ملتمس السراح المؤقت للرابّور “الكناوي” لي تم اعتقالو نهار الجمعة، وقررات الهيئة تأجل جلسة المحاكمة حتى للخميس الجاي.
الرابور عندو اتهامات بسب وقذف موظفين عموميين أثناء مزاولة مهامهم والإهانة والقذف في حق هيئة منظمة.
حاليا الكناوي مشا لحبس العرجات نواحي سلا، وغادي تم متابعتو في حالة اعتقال.
وكان مصدر أمني أكد في وقت سابق أن اعتقال الكناوي معندو علاقة بأغنية “عاش الشعب” لي فيها كلام قاصح وسب للسلطات، وأكد المصدر أن الرابور كان مبحوث عليه في قضية اخرى بعدما دار فيديو كيسب فيه البوليس.
الأغنية وصلات ل 7 مليون مشاهدة، وشدات الطوندونس المغربي كثر من 4 أيام، ودابا مازال طالعة في اليوتوب لكن في الرتبة 30 من بين 50 فيديو الأكثر مشاهدة.