علاش “عاش الشعب” عرفات هاد النجاح وواش كاين وعي سياسي عند مالين الراب لمغاربة؟ ها اش قال متخصص فهاد الفن: ماشي وعي سياسي عند الرابورة وغير كعية وغضب على اللي كيعيشوه

اغنية “عاش الشعب” محيحة. وصلات فمدة قصيرة ل2.4 مليون مشاهدة فقناة “ولد لكرية”. بعيدا على البوليميك اللي دارتو وسالات باعتقال واحد من ثلاثة الروابة مالين الاغنية اللي هو “الكناوي”.
علاش طلعات فالطوندونس؟ هاد السؤال وجهاتو “كود” لخبير مغربي فاغاني الراب اللي ما بغاش يقول اسمو. ردو كان انه شيء عادي تطلع “راه الرابور الكناوي مولف كيكون فالطوندوس. ولد لكرية رابور ديال فاس كان من اصحاب السوابق وعفى عليه الله (داكشي علاش كيبان بالسيكاتريس)”.
يعني ان هاد الشي ديال جوجت المليون عادي عند صحاب الراب. واخا لزعر اللي حتى هو فالاغنية ما معروفش بزاف.
لكن هاد الاغنية ديال “عاش الشعب” واش بداية لوعي سياسي عند الرابورة لمغاربة؟ الخبير قال ل”كود” “هاد الراب واحد النوع أصلاً كيكون سياسي (الراب الواعي rap conscient و اللي كان كيمتاز بيه الشاطئ الشرقي الأمريكي rap east coast) . راه شحال هاذي كاينين شباب كيديرو راب برسائل سياسية فالمغرب و لكن كانو كيبقاو مخبيين فالاندرگراوند ، ما مسوق ليهم حد”.
واعتابر الخبير فتصريحو ل”كود” ان “هاد التيتر استافد من الشهرة اللي كتعطيها الطوندونس ديال يوتوب و تشاف بزاف فالأول بسبب البروفيل ديال الرابورة لمشاركين فيه: الكناوي للي معروف بالمواضيع الملتزمة، و ولد لكرية للي شحال هاذي كيعاود على الفقر المؤدي إلى عالم الإجرام. من بعد بطبيعة الحال الفانز غادي يبارطجيو الأغنية و الجرأة ديالها غادي تخلي الفيديو يتشاف بزاف”.
واضاف الخبير ل”كود” “السؤال هو شحال غادي تبقى فالطوندونس. واش المشاهدة غير فضول ولا تعني نشأة وعي سياسي عند المستمعين؟ أنا ارجح الفضول فيما يخص السبان فهاذي مزايدات ديال بعض الروابا كيحاولوا يبانو شجعان و كيعطيو القاصح ولكن البنية الفكرية اللي كتبان خصوصا من خلال الاستجوابات ديالهم فبعض الحلقات أو اللايفات كتبين بأن ما زال خاصهم شوية ديال الوقت و الدراسة باش يمكن ليهم يبنيو خطاب سياسي و ايديولوجي متكامل”.
الخبير ختم تصريحو ل”كود” باللي دابا هادا “غير كلام / زجل ناتج عن الغضب و الكعية على وضع كيعيشوه”.