فين غادي الناصيري بالوداد. بركان عندو الشجاعة وقف الهلالي.. ورئيس “الواك” كايقلب على شماعة باش ماتوقفش الجامعة جبران.. وافينك أسي مكوار

سعيد الناصيري رئيس الوداد البيضاوي كايدير كلشي ف الفرقة، وكايتدخل في جميع التفاصيل صغيرة أو كبيرة، ما كايخلي حتا شي حد يدخل معاه ف الخط، يعني باختصار المفيد هو كلشي، وإلا ما كانش ما تقلعش الوداد. هذا هو الناصيري.
البارح اللاعب يحيى جبران صدر منو سلوك غير اخلاقي ف ماتش نهضة بركان في مركب محمد الخامس في الدار البيضاء، برسم مؤجل الدورة الخامسة من منافسات البطولة.
وعوض أن يبادر الناصيري إلى معاقبته، لأن سلوك البصق على الحكم مرفوض وغير مقبول على الاطلاق، دار راسو ما سمع ما شاف.
من المضحكات المبكيات، أن الوداد بغا يبعد التهمة على لاعبه جبران من خلال التأكيد أن البصق كان في حق زميله عماد العلمود، ونسى بلي البصق أو البزاق بالدارجة المغربية ديالنا، يعاقب عليه طبقا لقوانين كرة القدم في جميع أنحاء العالم، ما شي غير عند الجامعة.
الغريب أن الناصيري وبعض أبواقه المحسوبة باغيين يأثروا على لجنة التأديب والروح الرياضية، اللي غادي تجتمع غدا الثلاثاء، باغيين عقوبة مخففة ما شي ثقيلة، لحقاش جبران ديال الوداد ما شي شي فرقة صغيورة لي نحگروا عليها.
واش الجامعة غادي تكون عندها الشجاعة وتطبق القانون، وتستحضر عادل حليوات المسكين، لي وقفاتو 6 أشهر بعدما بزق على لاربيط حتا هو.
علاش الناصيري ما دارش بحال الناس ديال نهضة بركان، لي سبقوا الجامعة وقفوا بكر الهلالي 2 ديال الماتشات بعد احتجاجه المبالغ فيه على الحكم واستفزازه جمهور الوداد وأكثر من ذلك غرموه بثلاثة ديال المليون، واعتذروا للوداديين فوق هادشي كامل، لحقاش نهضة بركان باغي يعطي القدوة ويبين انه ما غاديش يتساهل مع مثل هذه التصرفات الطائشة.
الناصيري مادارش هادشي كامل، او جزء منه على الاقل، وكأنه كيشجع اللعابة ديالو على مثل هذه السلوكيات المشينة. بالأمس القريب ما بغاش رضا التكناوتي يكون رونبلاصون للحارس أنس الزنيتي مع المنتخب المحلي والبارح بزق جبران على الحكم الداكي رداد والقادم يعلمه الله. الناصيري للاسف لم يستغل ما يقدمه الجمهور الوداد من تضحيات جسام وشفنا كيفاش كيبدع ف تيفو ورا تيفو حتا رجع العالم كلوا كيتكلم عليه.
فين غادي الناصيري بوداد الأمة… وفينك أ سي مكوار.