مسلم عمرو مكان محافظ ولا رجعي كان غير طنجاوي ولد حي شعبي ودابا راه مولاش حداثي كول بل غير طنجاوي فات لقصر لكبير وصافي

بزاف ديال الصفحات في فايسبوك وخصوصا الشمالية حطات مقاطع من أغاني مسلم القديمة ملي كان كيحلم يشوف المغربية محترمة بالحجاب ديالها وحطوها مع تصاورو الجداد مع أمل صقر، وكيفاش تطور من شاب طنجاوي رجعي محافظ واخا كاع يكون مبلي بشي موصيبة كحلة ولكن ضروري من الحد الأدنى من القيم المحافظة وخصوصا فيما يتعلق بالعلاقة مع النسا، لديوثي متشبع بأخلاق العروبية سمح في بنت الحومة لي بدات معاه من الزيرو وداير معاها وليدات ومشا مع مولات التجارب المتعددة بولادها كبيرة عليه ومشهورة وهي غادة عبد الرازق ديال المغرب، هادي راه دورة ديال الزمان لي دار مسلم من شاب ولد حي شعبي في طنجة لي فالغالب كتلقى الدماغ مغطي بطبقة غليضة ديال البغلي، إلى نجم مغربي كول.
مسلم عمرو مكان محافظ ولا رجعي كان غير طنجاوي ولد حي شعبي ودابا راه مولاش حداثي كول بل غير طنجاوي فات لقصر لكبير وصافي، وهادشي كيوقع لأي طنجاوي خصوصا جيل التمانينات ولاد الأحياء الشعبية لي عاشو غير مع نتائج الهجرة القروية لطنجة وكيسمعو بالخبير ديال طنجة الدولية وعظمتها أنذاك بدون مايعرفو تفتحها وتنوعها، وطبعا نهار كيخرجو على طنجة ويبعدو على الشمال كيكتشفو الحضارة المتمدنة، وبنادم كول، وكيعرفو أنه كاين مغربيات كيتعشاو فمطاعم ويكلسو فبيران ويشربو الشراب بلا مايكونوا قحاب، أن ماشي أي بلاصة فيها الشراب راه بحال موروكو بالاص ولا شهرزاد، وأن ماشي أي وحدة لابسة قصير ولا عريانة كاع فهي لا ترد يد لامس، وأن داك بنادم لي كنسميوه عندو عقلية كاورية راه غير مغاربة بحالنا ولكن متحضرين علينا وصافي.
فالتمانينات وبداية التسعينات في طنجة كان الى بغيتي تشوف بنت لابسة سروال الجين خاص تطلع على لبولفار ولا البلاية وأغلب البنات كانو بالحجاب، ماشي داك الحجاب الإديلولوجي ديال الخوانجية وإنما حجاب قروي معندو علاقة بتاخوانجيت ولكن عندو قابلية ليها، وكانو المنقبات كثار بزاف على خلاف اللثام التطواني والطنجاوي لي كانو كيديروه العيالات بنات المدينة المأصلات دخل نقاب جديد جابوه من الشرق والالوان كحلة ومغلوقة والتجمعات عند الإخوة والأخوات( منهم الأم ديالي)، وكثر من أي مدينة أخرى كيبقى الشمالي كائن أقرب للتدعشش وعندو قابلية غير يسحى من الطلعة ديال الغبرة يشد معاك الطريق لسوريا، هاعلاش كانو ولاد الشمال غير كيفوتوا القصر كيتبهرو فمدى الإنفتاح ديال المغاربة فالداخل، والسقف ديال الإبهار هو مدى إنفتاح الأنثى هناك، وهادشي لي وقع لخاي مسلم مكانش محافظ ومولاش حداثي فقط طنجاوي مشا لكازا.