كَاد المالح: ماعنديش الجنسية الفرنسية.. وجراو عليا 8 ديال المدارس فالمغرب!

الكوميدي المغربي كَاد المالح أكد أنه مغربي وعندو غير الجنسية الكندية، ومستقر في فرنسا بالإقامة فقط، اي كيخلص الضرائب ولكن ماعندوش الحق في التصويت.
الكازاوي الحقيقي كشف في برنامج “ambition intime” على قناة “M6” نهار الاثنين أنه عندو علاقة قوية بزاف مع الأم ديالو، وأنه دوز 8 ديال المدارس في المغرب بين البعثة الفرنسية والمدارس الخاصة حيت كان مشاغب بزاف وكيجريو عليه حيت كيطلعها على الأساتذة.
ومن بين هاد المدارس الليسي “ليوطي”، لي اختار گاد يمشي ويوقف قدامو مع فريق التصوير، والتلاميذ كانو فرحانين بشوفتو وبداو كيغوتو ويعنقو فيه.
البرنامج تصور في باريس ونيس، وكازا، لي هي بلايص كتعني بزاف للكوميدي المغربي لي غادي يرجع بسكيتش جديد سميتو D'ailleurs وغادي يدير جولة ففرانسا ابتداء من شهر أبريل 2020.