الحقارة هي هادي.. ملف “حمزة مون بيبي” مازال مفتوح ودنيا باطمة باغة محمد السادس يتدخل -فيديو

المغنية دنيا باطمة خرجات في لقاء مع قناة “العربية” اليوم الأحد، باش تدوي على موضوع استدعاءها من قبل الشرطة القضائية للاستماع ليها في قضية “حمزة مون بيبي” لي كان داير عصابة ابتزاز وتشهير، من خلال كونطات في سناب شات وانستكَرام.
المغنية دخلات الملك محمد السادس في القضية واخا الملف مازال مفتوح، وتحت التحقيق، وطالبات باش يتدخل ويشدو المسؤول الأول على الحساب وزادت “بلغ السيل الزبى”.
المغنية بغات القضاء ومحمد السادس يوقفو معاها، والناس مايبقاوش يشوهو ليها صورتها وسمعتها، حيت كيجبدو اسمها وكيربطوه مع الكونط لي كانت ديما كتهدر عليه فالفيديوهات وتغني ليه مع الدقة المراكشية، وخرجات في كثر من حوار مازالين في اليوتوب كتدوي عليه بكل ثقة وكتأكد انه كيعجبها.
في اللقاء لي مفروض تدوي فيه على راسها جبدات الملك جوج ديال المرات ودوات على الأوسمة لي عندها وقالت “قبل ما ندير أي خطوة كنفكر في ملكنا وبلدي، واسمي وعائلتي”.
دنيا ماعارفاش بأن تدخل اسم الملك في هاد القضية وتجبدو في قناة سعودية في موضوع داير الجدل وفيه بزاف ديال القيل والقال راه حشومة. وكيفما ماكتبغيش لي يجبد اسمها في هاد القضية حتى الملك خاص ميتجبدش اسمو حيت هو بعيد على هادشي وضروري يتوقر.
وسياسيا هادشي لي دارت دنيا عيب وعار، عيب يتجبد الملك في قناة عندنا معاها مشاكل تحت الطبلة وهادي مدة قصيرة دوزات لينا الخريطة ديال المغرب مقطع منها الصحراء ديالو.